Ինչ պետք է պայմանավորվեն Սարգսյանն ու Պուտինը
Նախագահ Սերժ Սարգսյանը մարտի 10-ին աշխատանքային այցով մեկնելու է Մոսկվա, որտեղ հանդիպելու է նախագահ Վլադիմիր Պուտինի հետ։ Հանդիպման ընթացքում քննարկվելու են երկկողմ առևտրատնտեսական, ներդրումային, էներգետիկայի, եվրասիական տարածքում ինտեգրացիոն գործընթացների զարգացման հեռանկարին վերաբերող հարցեր: Նախատեսված է նաև մտքերի փոխանակում ԼՂ հիմնախնդրի կարգավորման բանակցային գործընթացի ներկա փուլի, առկա խնդիրների և այդ գործընթացն առաջ մղելու հնարավորությունների շուրջ: Քաղաքագիտական շրջանակներում Պուտինի հետ Սարգսյանի այս հանդիպումը հերթականներից չեն համարում եւ մեծ ակնկալիքներ ունեն դրանից: Ռուսական «Կոմերսանտ» պարբերականը նախօրեին ՀՀ արտգործնախարար Էդվարդ Նալբանդյանի հետ հարցազրույց է հրապարակել, որի նախաբանում, հղում կատարելով երևանյան ինչ-որ անանուն դիվանագիտական աղբյուրների, գրում է, թե Մոսկվայում լրջորեն անհանգսացած են հայ-ադրբեջանական զինված ուժերի միջև շփման գծում բախումների քանակի աճով։ Թեև վերջին օրերին հակառակորդն իսկապես սկսել է ղարաբաղա-ադրբեջանական շփման գծում թեժացնել իրավիճակը, այդուհանդերձ Մոսկվայի անհանգստությունն արտառոց է թվում մի պարզ պատճառով, որ նախկինում էլ ավելի թեժ իրավիճակներ են գրանցվել, մինչդեռ պաշտոնական Մոսկվան քար լռություն է պահպանել:Արդյոք այդ անհանգստությունն առավել քան պայմանավորված չէ Հայաստան-ԵՄ վերջին զարգացումներով եւ հավանական նոր փաստաթղթի ստորագրման հեռանկարով: Քանի որ Եվրամիության արտաքին քաղաքականության և անվտանգության հարցերով բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինի անցյալ շաբաթ Հայաստան կատարած այցի ժամանակ նախարար Նալբանդյանի հետ վերահաստատեց իրավական նոր հիմքով համաձայնագիր ստորագրելու` Բրյուսելի և Երևանի կամքը։ Մոգերինին Երեւանում հայտարարեց նաեւ, որ Երևանի հետ նոր համագործակցությունը պարունակում է Հայաստանի անվտանգության ապահովման և սուվերենության մակարդակի բարձրացման հեռահար նպատակ։ Քաղաքագետ Լեւոն Շիրինյանը համաձայն չէ, որ Մոսկվան անհանգստացած է ԵՄ-ի հետ նոր համագործակցության հեռանկարից.<<Ռուսաստանը խանդի որեւէ առիթ չունի, ի վերջո, մենք հո ռուսների ճո՞րտը չենք>>,-նկատեց Շիրինյանը հիշեցնելով արտգործնախարար Ննալբանդյանի նույն թերթում արված մեկ այլ հայտարարությունն առ այն, որ Հայաստանի դաշնակիցը միայն Ռուսաստանն է եւ ուրիշ ոչ ոք: Ի դեպ, Նալբանդյանն ասել է, որ այդ մասին ասել է նաեւ Մոգերինիին.<<Կարծում եմ՝ Ռուսաստանին չի խանգարի, որ մեր միջոցով հարաբերություններ ունենա Եվրոպայի հետ, որի հետ հարաբերությունները վատացել է: Ռուսաստանը հավանաբար հայկական լոբբիստական կառույցների կարիքն ունի, որոնք սփյուռքում կգործեն նաեւ իրենց օգտին>>: Ըստ քաղաքագետի՝ իրականում ակնհայտ է, որ ռուս-թուրքական հակամարտությունում հավասարակշռությունը վերջին շրջանում փոխվել է հօգուտ Ռուսաստանի եւ, սա ըստ ամենայնի ,հանդիպման առիթը եւ որոշակի հարցերի քննարկման անհրաժեշտություն է առաջացել.<<Ռուսաստանի պատմության մեջ առաջին անգամ ռուսական զորքերը անցել են հայկական Տավրոսը ու մտել Սիրիա, բացառված է, որ այնտեղից դուրս գան, նույնիսկ միջուկային պատերազմի կգնան, բայց դրանից դուրս չեն գա: Չպետք է մոռանալ, որ Հայաստանը Ռուսաստանի հետ պաշտպանական համակարգի մեջ է,նախ որպես ՀԱՊԿ-ի անդամ երկիր, երկրորդ՝ հակաօդային միասնական պաշտպանական համակարգում:ԱՄՆ-ն զիջում է, եվրոպացիներն առանձնապես հավանություններ չեն դրսեւորում, որովհետեւ վախենում են Ռուսաստանից եւ այս պայմաններում նախագահ Սարգսյանը Պուտինի հետ պետք է պայմանավորվի Ադրբեջանին սկացնելու վերաբերյալ>>, հորդորեց մեր զրուցակիցը: Շիրինյանի խոսքով՝ եթե մինչեւ հիմա Ռուսաստանը փորձել է հավասարակշռություն պահպանել Հայաստանի եւ Ադրբեջանի միջեւ, հիմա պետք է մարտավարությունը փոխի եւ ցույց տա, որ մենք ենք իր դաշնակիցը.<<Եթե Ռուսաստանն իսկապես անհանգստացած է, ապա պետք է ընդունեն մեր առաջարկները>>: Անի Սահակյան
Հետևեք մեզ Viber-ում
