Ով է Գոռ Վարդանյանի էջից ջնջել Սերժ Սարգսյանին ուղղված շնորհավորանքը

  «Ես շնորհավորել եմ հայ ժողովրդին ու շնորհակալություն եմ հայտնել Սերժ Սարգսյանին այդ որոշման համար:Շատ կարևոր որոշում կայացրեց Սերժ Սարգսյանը: Դրա համար ուրախ էի », - լրագրողներին նման պատասխան տվեց  Երևանի քաղաքապետ Տարոն Մարգարյանի խորհրդական Գոռ Վարդանյանը ՝ անդրադառնալով համացանցում հայտնված տեսանյութին, որում նա շնորհավորում էր ժողովրդին այն օրը, երբ հրաժարական էր տվել ՀՀ վարչապետ Սերժ Սարգսյանը: Լրագրողներից մեկի հարցին, թե ինչո՞ւ  է Facebook-յան էջից հեռացրել Սերժ Սարգսյանիn ուղղված շնորհավորական ուղերձը, երբ վերջինս ընտրվել էր վարչապետ, Գոռ Վարդանյանը պատասխանեց. «Իմ Facebook-յան էջերում աշխատել են աշխատողները, ես տեղյակ չեմ եղել, որ ջնջել են, որի պատճառով բոլորն ազատվել են աշխատանքից»: Տարոն Մարգարյանը չի՞ բարկացել, որ իր խորհրդականը դուրս է եկել փողոց ու ժողովրդի հետ կիսել ուրախությունը,հարցրեցին լրագրողները Գոռ Վարդանյանն ասաց, թե ինքը պարզապես դուրս է եկել փողոց՝ շնորհավորելու ժողովրդին: «Մեր ժողովուրդն է, մեր երեխաներն են, մեր քույրիկներն են ու եղբայրները, վատ բա՞ն կա այդտեղ, ես ժողովրդական մարդ եմ, ես շփվում եմ բոլորի հետ, ցանկացած պահի դուրս եմ գալիս փողոց, կազմակերպում եմ սպորտային միջոցառումներ, դաստիարակում եմ, ուղղություն եմ ցույց տալիս», - նշեց նա: Գոռ Վարդանյանն ասաց, որ հայ ազգն ունի մեկ թշնամի: «Մեր թշնամին թուրքն է, մեր ժողովրդի մեջ չի կարելի սեպ խրել, որովհետև նույն Հանրապետական կուսակցության մեջ կան շատ հայրենասեր, քաղաքական գործիչներ, շատ լավ հայեր, չի կարելի բոլորին կոխրճել ու բոլորի հասցեին վատ բաներ ասել», - ասաց Գ. Վարդանյանը: