Նիկոլ Փաշինյանը հանրահավաքներ է անելու Գյումրիում և Վանաձորում

«Իմ քայլը» նախաձեռնությունը վաղը՝ ապրիլի 27-ին, Երևանում բողոքի լայնածավալ գործողություններ չի անելու։ Այդ մասին Հանրապետության հրապարակում ընթացող հանրահավաքում հայտարարել է ԱԺ պատգամավոր Նիկոլ Փաշինյանը։ Նա նաև նշել է, որ վաղը հանրահավաք են անելու ոչ թե Երևանում, այլ Գյումրիում։ «Երևանում վաղվա համար բոլոր գործողություներն առժամանակ դադարեցվում են, որպեսզի Երևանում մեր ակտիվիստները 1-2 օր հանգստանալու, ուժերը վերականգնելու հնարավորություն ունենան: Բայց եթե կան մարդիկ, ովքեր ինձ նման հանգստանալու և ուժերը վերականգնելու խնդիր չունեն, վաղը ժամը 3-ին իրենց ավտոմեքենաներով, որոնց վրա պետք է պարտադիր լինեն համարանիշեր, հավաքվում ենք Աշտարակի խճուղում և ավտոերթով գնում գյումրեցի մեր եղբայրների մոտ, հուսով, որ նրանք մեզ կդիմավորեն Շիրակի մարզի մուտքի մոտ: Իհարկե, բոլոր այն բնակավայրերը, որոնք գտնվում են մեր ճանապարհին, կուզենան հանդիպել մեզ, կողջունենք նաև նրանց: Իսկ մյուս օրը՝ ապրիլի 28-ին, ժամը 15-ին մենք կլինենք Վանաձորում: Այդ օրը ժամը 12-ին հավաքվում ենք «Հարսնաքար»-ի մոտ ու շարժվում ենք Վանաձոր: Ապրիլի 29, 30, 31-ին մեր բոլոր գործողությունները Երևանում վերականգնվելու են աննախադեպ թափով և ծավալներով: Մեր ձեռքերը բաց են, բայց մենք մեր ձեռքերից հաղթանակը ոչ մի կերպ բաց չենք թողնելու»