«Չեմ բացառում, որ Նիկոլ Փաշինյանն ընտրվի վարչապետ, բայց՝ ոչ այդպես». Կարեն Կարապետյան

«Ասել եմ, որևէ փակ օրակարգ չկա՝ ընդհուպ մինչև արտահերթ ընտրություններ Մենք այսօր որևէ սահմանափակում քաղաքական օրակարգում չենք դնում ու չենք էլ դրել: Ամենատրամաբանական լուծումն այն է, որ քաղաքական կուսակցությունները նստեն, քննարկեն: Եթե որոշեն, որ արտահերթ ընտրությունների անհրաժեշտություն կա, ըստ դրա շարժվենք առաջ: Եթե այսպես շարունակենք, ունենալու ենք տնտեսական խնդիրներ, ապակայուն վիճակը մեր երկրին օգուտ չի կարող տալ: Ես հորդորում եմ մեր ժողովրդին մաքսիմալ սթափ մտածել: Մենք բավարարել ենք կետեր, մենք հայտարարում ենք, որ քաղաքական ուժերը նստելու և խոսելու են, մեկս մյուսի վրա չճնշենք»,- այսօր լրագրողների հետ հանդիպման ժամանակ ասաց ՀՀ վարչապետի պաշտոնակատար Կարեն Կարապետյանը: Հարցին՝ հնարավոր համարում է ընտրել «այսպես կոչված ժողովրդի վարչապետի թեկնածուին», Կարեն Կարապետյանը պատասխանեց. «Այսպես կոչված վարչապետի թեկնածուն ո՞րն է: Մի հատ բացատրեք: Ես որևիցե մի երկիր չգիտեմ, որտեղ ժողովրդի ընտրած թեկնածուն այդպես է ընտրվում: Գոյություն ունեն ընտրություններ: Կան մեր քաղաքացիները, որոնք դժգոհ են, բայց ո՞նց չափենք՝ այդ քացացիներն ուզում են Նիկոլ Փաշինյանին, մեկ այլ քաղաքացիներ ուզում են մեկ այլ թեկնածուի, ինչպե՞ս մենք վարվենք», - նշեց ՀՀ վարչապետի պաշտոնակատարը։ Կարեն Կարապետյանն ընդգծեց՝ առաջարկում են անել արտահերթ ընտրություններ։ «Եթե ժողովրդի ընտրյալն ինքն է, ինքը կգնա»,- նշեց նա։ Հարցին՝ բացառո՞ւմ է, որ իշխանությունը կգնա այդ քայլին, նա պատասախնեց. «Ես բացառում եմ, որովհետև ժողովրդի ընտրյալն ընտրվում է ընտրությամբ, ես չեմ բացառում, որ ժողովրդի ընտրյալը դառնա թեկնածու, դա իմ կամքը չի»։