Ո՞ր մի երկրում նախագահին կասեն՝ դու արի ստեղ հանդիպելու և ինքը կգնա.Նալբանդյան

Երկրում տեղի ունեցող վերջին զարգացումների լիցքաթափման ձևը բարի կամքն ու երկխոսությունն է, լրագրողների հետ հանդիպմանն ասաց ՀՀ արտաքին գործերի նախարար Էդվարդ Նալբանդյանը։ «Բայց որևէ երկխոսություն, բարի կամք, կարող է հաջողություն ունենալ, եթե դա պատասխան է ստանում, երկկողմանի է։ Այս պարագայում երկրի ղեկավարները, հոգևոր առաջնորդները, քաղաքական ուժերը, մեր միջազգային կառույցները բազմաթիվ կոչեր են արել երկխոսության։ Մինչ այսօր այդ երկխոսությունը, փաստորեն, մերժվել էր։ Դա ակնհայտ դարձավ նաև երեկվա հանդիպմանը՝ վարչապետի և Նիկոլ Փաշինյանի միջև», - նշեց Նալբանդյանը։ Նախարարի խոսքով,ինքը բազմաթիվ հադիպումներ է ունեցել դեսպանների հետ, ովքեր գնահատել են այն համաչափ, առավել քան զուսպ մոտեցումը, որը ցուցաբերվել է իրավապահ մարմինների կողմից: «Ո՞ր մի երկրում նախագահին կասեն՝ դու արի ստեղ հանդիպելու և ինքը կգնա: Չեմ կարծում էդպիսի երկիր կարող եք դուք ինձ հիշեցնել: Կամ վարչապետին: Եվ ասել, չէ, դու արի այստեղ, այդ ժամին և այս ձևաչափով և այլն: Բայց հանրապետության նախագահը, դուք էլ տեսաք, այցելեց Հանրապետության հրապարակ՝ հանդիպելու Նիկոլ Փաշինյանի հետ:Որևէ հանդիպում կամ բանակցություն մամուլի ներկայությամբ չի լինում: Ոչ մեկ դեմ չէ մամուլին հրավիրել և՛ սկզբում, և՛ վերջում, ինչպես կարգն է, բայց, միգուցե, ավելի ճիշտ կլիներ, ավելի օգտակար կլիներ և ավելի արդյունավետ կլիներ, եթե իսկապես հանդիպում լիներ և բանակցություններ լինեին: Բայց, փաստորեն, մերժվեց այդ երկխոսության առաջարկը»,- հավելեց Էդվարդ Նալբանդյանը: