Տարածքային նոր պահանջներ Հայաստանին. Ալիևի հարվածը վարչապետ Սարգսյանին
«Շանթ» հեռուստաընկերությանը տված հարցազրույցում, անդրադառնալով ղարաբաղյան բանակցային գործընթացին վարչապետ Սերժ Սարգսյանն ասել է. «Եթե մենք ունենայինք այլ ճանապարհ՝ առանց զիջումների ասելու՝ ամբողջը մերն է, և վերջ, միգուցե կարելի էր դրան գնալ»: Նրա խոսքերով՝ չունենք այդպիսի ճանապարհ: «Դա խաղաղության ճանապարհը չէ: Խաղաղության ճանապարհը համաձայնության գալն է: Իսկ համաձայնության գալու համար անհրաժեշտ է երկու կողմի կարծիքը»: Նա, այնուամենայնիվ, հավելել է, որ մեր ամենօրյա գործը պետք է լինի ամեն ժամ հայկական զինված ուժերի մարտունակությունը բարձրացնելը. «Սա է ամենառեալ միջոցը կայունությունը պահպանելու: Իհարկե, մենք պետք է զարգացնենք հարաբերությունները մեր դաշնակիցների հետ, որովհետև նրանցից էլ շատ բան է կախված, բայց ամենահիմնականը հայ զինվորն ու սպան են»: «Բանակցային պրոցեսը պետք է շարունակվի: Մենք մեր դիրքորոշումները չենք փոխելու Արցախի հարցում»: Հարցին, թե խոսքը զիջումների մասի՞ն է, Սերժ Սարգսյանը ասել է. «Այ, որ իրենք հրաժարվեն այդ պատրանքներից, թե փոխզիջում նշանակում է հայկական կողմերի և ադրբեջանական կողմի կողմից, այդ ժամանակ խնդիրը կարող է լուծվել»: Խաղաղության ճանապարհը համաձայնության գալն է, փոխզիջումներն են, փաստացի կրկնում է պաշտոնական Երևանի դիրքորոշումը Սերժ Սարգսյանն, ըստ ամենայնի միջազգային հանրությանը ներկայացնում է հայկական կողմի բանակցային պատրաստակամությունը՝ խաղաղ բանակցությունների շարունակման առումով: Իսկ ի՞նչ է ասում այս օրերին Ալիևը, որի ռազմատենչ հայտարարությունները միջազգային հանրությունը հետևողականորեն անտեսում է... Ալիև կրկին պնդում է՝ «ոչ միայն Ղարաբաղը, այլ նաև ժամանակակից Հայաստանը գտնվում են Ադրբեջանի պատմական հողերում», նախօրեին հայտարարել է Ադրբեջանի նախագահ Իլհամ Ալիևը՝ նախագահի պաշտոնում իր չորրորդ երդմնակալության արարողության ժամանակ: Իր ելույթում նախագահ Ալիևը խոստացել է շարունակել բանակի հզորացումը, որն իր խոսքերով՝ արագացված տեմպերով արվում էր վերջին 15 տարիներին: «Այսօր ադրբեջանական բանակը աշխարհի ամենաուժեղ բանակների շարքում է՝ իր հագեցվածությամբ, զինվածությամբ, տեխնիկայով, անվտանգությամբ»,- թվարկել է նա և կրկին անգամ խոսել ապրիլյան պատերազմի մասին: «Ապրիլյան մարտերը՝ մեր փառավոր պատմությունն է, մեր մեծ հաղթանակը: Ադրբեջանական բանակը ազատագրել է մեր օկուպացված հողերի մի մասը, մենք վերահսկում ենք հազարավոր հեկտարներով տարածքներ, այդ հողերում կյանքը վերադառնում է, այդ հողերում ադրբեջանական դրոշն է ծածանվում»,- հայտարարել է Ադրբեջանի նախագահը՝ ևս մեկ անգամ խոստանալով, որ կազատագրի «օկուպացված հողերը»: Ադրբեջանի նախագահը, որն իր նախաձեռնած սահմանադրական փոփոխությունների շնորհիվ կպաշտոնավարի նախկինի պես ոչ թե 5, այլ արդեն յոթ տարով, խոսել է նաև Ղարաբաղյան հակամարտությունից: Նա կրկնել է պաշտոնական Բաքվի դիրքորոշումը՝ հակամարտությունը պետք է կարգավորվի բացառապես տարածքային ամբողջականության շրջանակներում: «Մենք երբեք թույլ չենք տա երկրորդ հայկական պետության ստեղծում»,- հերթական անգամ հայտարարել է Ալիևը շարունակելով. - «Մենք միջազգային հանրությանը կհասցնենք այն, որ ոչ միայն Ղարաբաղը, այլ նաև ժամանակակից Հայաստանը գտնվում են Ադրբեջանի պատմական հողերում: Դա ապացույցներ ունի: Մենք մի քանի անգամ արտաքսվել ենք, ինչի մասին միջազգային հանրությունը պետք է տեղյակ լինի»: Ահա հետընտրական իրավիճակներում Սերժ Սարգսյանի և Իլհամ Ալիևի ելույթների տարբերությունը. մեկն անընդհատ շեշտում է՝ խաղաղություն փոխզիջումների միջոցով, իսկ Ալիևը՝ կրկնում է՝ «միայն տարածքային ամբողջականություն», գումարած՝ տարածքային պահանջներ Հայաստանի նկատմամբ, ու այս էլ արդեն որերորդ անգամ, կոնկրետ վերջին ամսվա ընթացքում՝ արդեն երկրորդ անգամ: Հետընտրական ստարտը ղարաբաղյան հարցում, այսպիսով, տրված է. իրավիճակը ոչ միայն հուսադրող չէ, այլ՝ նույնիսկ վտանգավոր: Ալիևն, ըստ ամենայնի, հող է նախապատրաստում գործողությունների: Թամար Բագրատունի
Հետևեք մեզ Viber-ում
