Պաթոլոգիա. Ցանկացած ցույցի հետևում Մոսկվան ԱՄՆ դեսպանատան «ակաջներն» է տեսնում

Ռուսաստանը հույս ունի, որ իրավիճակը Հայաստանում կզարգանա օրենքի շրջանակում, երեկ հայտարարել է Ռուսաստանի նախագահի մամուլի խոսնակ Դմիտրի Պեսկովը՝ պատասխանելով այն հարցին՝ հետևո՞ւմ է արդյոք Մոսկվան Երևանի իրադարձություններին: Նա հիշեցրել է, որ երեքշաբթի Ռուսաստանի նախագահ Վլադիմիր Պուտինը շնորհավորական ուղերձ է հղել Սերժ Սարգսյանի՝ վարչապետ ընտրվելու կապակցությամբ, ավելի ուշ հեռախոսազրույց է ունեցել նրա հետ: «Մենք հետևում ենք՝ ինչ է տեղի ունենում Հայաստանում, և, գլխավորը, հույս ունենք, որ ամեն ինչ տեղի է ունեցել օրենքի շրջանակում»,- ասել է Պեսկովը: Իսկ ահա Ռուսաստանի Պետդումայի՝ ԱՊՀ, Եվրասիական ինտեգրման և համերկրացիների հետ կապերի հարցերով կոմիտեի փոխնախագահ Վիկտոր Վոդոլացկիյն էլ, մեկնաբանելով Երևանում տեղի ունեցող իրադարձությունները, դրանում մեղադրել է ամերիկյան կառույցներին: «Երբ իշխող կուսակցությունը հայտարարեց, որ կառաջադրի Սերժ Սարգսյանին կառավարության ղեկավարի պաշտոնում, նույնպես փողոց դուրս եկան երիտասարդներ՝ իրենց բողոքն արտահայտող պաստառներով: Ես տեսել եմ այդ երեխաներին: Հասկանալի է, որ նրանք հստակ օգտագործվում են Ամերիկայի դեսպանատան կողմից: Այսինքն, այսօր Հայաստանն այնպիսի աշխարհաքաղաքական երկիր է, որը կարող է խզել Ռուսաստանի հետ միությունը: Ամեն անգամ այս փողոց դուրս գալը տեղի է ունենում դեպքից դեպք, երբ Հայաստանում տեղի են ունենում ընտրություններ խորհրդարանում, կամ այս անգամ՝ անցումը նախագահականից խորհրդարանական կառավարման: Քանի որ ամերիկացիները հասկանում են, որ կառավարության ընտրված նախագահ Սերժ Սարգսյանը կառաջարկի սերտ համագործակցություն Ռուսաստանի հետ»,- ասել է Վոդոլացկիյը: Այնուհետև, պատգամավորն իր պարտքն է համարել նշել, որ Հայաստանում «թավշյա հեղափոխություն» տեղի չի ունենա, քանի որ Սերժ Սարգսյանը և նրա գլխավորած կուսակցությունը վայելում են Հայաստանի քաղաքացիների աջակցությունը: Նախանձելի հետևողականությամբ Հայաստանում ինչ գործընթացներ տեղի են ունենում՝ Ռուսաստանում այդ գործընթացների հետևում Ամերիկայի դեսպանատան «ականջներն» են տեսնում ու անմիջապես «Մայդանին» նմանեցնում: Այդպես էր «Էլեկտրիկ Երևանի» և այլ բողոքի ցույցերի դեպքում: Մոսկվայի այս պահվածքն արդեն պաթոլոգիայի է նմանվում: Ցանկացած գործողություն ռուսները պատրաստ են ընդդեմ ռուսական շահի ներկայացնել: Նախ՝ Մոսկվան բոլոր պետություններում պաշտպանում է գործող իշխանությանը, ապա՝ դեմ ցանկացած գործողություն պատրաստ է ներկայացնել որպես «չար ուժերի» ձեռնարկած գործ: Այնուհետև, քիչ անց, ի հայտ են գալիս քիչ թե շատ մտածող մեկնաբաններ, ու սկսում հիվանդագին այդ կասկածները ցրել: Իրականում ամեն ինչ պարզ է. Ռուսաստանը հետխորհրդային ցանկացած երկրում ժողովրդավարական որևէ դրսևորում, անկախ նրանից, թե ինչ արդյունքներ կլինեն՝ պատրաստ է ընդդեմ ռուսական շահի գործողություն համարել, այդպիսով հող նախապատրաստելով, որպեսզի տեղի իշխանությունները գործեն ավելի կոշտ: Թամար Բագրատունի