Ես որևէ խոչընդոտ չեմ տեսնում, որ հենց հիմա բանակցենք և երկխոսենք.Կարեն Կարապետյան

Հայաստանի առաջին փոխվարչապետ Կարեն Կարապետյանը՝ նոր պաշտոնին նշանակվելուց հետո առաջին հարցազրույցն է տվել: Արմենիա հեռուստաընկերության եթերում նա խոսել է Հայաստանում տեղի ունեցող իրադարձությունների մասին: «Ես առաջարկում եմ բոլոր քաղաքական ուժերին, երկրի ապագայի համար անհանգիստ մարդկանց՝ վերանայել իրենց մոտեցումները և երկխոսություն սկսել բոլոր հարթակներում, որպեսզի ապահովվի երկրի կայունությունը: Նույնիսկ պատերազմող երկրները բանակցում են և տրամաբանական լուծման են գալիս: Մենք՝ հայերս, Հայաստանի Հանրապետության քաղաքացիները, պարտավոր ենք մեր տան մեջ նստել, ռացիոնալ բանակցել և տրամաբանական լուծումներ գտնել այս իրավիճակից դուրս գալու համար: Ապակայանության դեպքում տուժելու ենք բոլորս, տուժելու է մեր երկիրը»,ասել է նա: Դուք  ինքներդ պատրա՞ստ եք որևէ կերպ հանդես գալ նախաձեռնությամբ կամ միանալ որևէ հարթակի, հարցրել է Արտակ Ալեքսանյանը :Կարեն Կարապետյանը դրական պատասխան է տվել՝ հավելելով, ինքը հենց դա էլ առաջակում է. «Այո, ես այդպես էլ ձևակերպել եմ, ես առաջարկում եմ դա»: Դիտարկմանը, որ կառավարությունը և իշխանությունն առաջարկում են որոշակի երկխոսություն, իսկ հանրահավաքի մասնակիցները կողմնակից են «թավշյա հեղափոխության», Կարեն Կարապետյանն ասել է. «Դա կարող է հենց հիմա լինել, եթե մենք ռացիոնալ ու պրագմատիկ մտածենք: Ես, ճիշտն ասած, շատ մեծ հույս ունեմ, որ մեր ազգը պրագմատիկ, ռացիոնալ լինելով, վտանգի զգացողություն ունենալով, որովհետև կյանքն է այդպես ստիպել, սթափ մտածելու է և հասկանալու է, որ հեռանկարային չի սա: Մենք ռեպուտացիոն կորուստներ ենք ունենում, մենք կանխատեսելի երկիր չենք ընկալվում, և դա բերելու է հետևանքների: Ես որևէ խոչընդոտ չեմ տեսնում, որ հենց հիմա բանակցենք և սկսենք երկխոսությունը: Ինչի՞ պետք է ինչ-որ պահի սպասենք՝ ինչպես այս իրավիճակից դուրս գալ: Լսենք հուզող հարցերը, տանք առաջարկներ, բարձրացնենք բոլոր կնճռոտ հարցերը և համարձակ խոսենք դրա մասին»,- ասել է նա ու եւս մեկ անգամ վստահեցրել, որ ինքը պատրաստ է դրան: