«Դե′ն նետեք ձեր մեդալները, եկեք, ժողովրդի կողքին կանգնե′ք». դերասաններ Ալինա Մարտիրոսյան ու Ջուլիետա Ստեփանյան

«Իմ քայլը» շարժմանը միանալու կոչերով քիչ առաջ հանդես եկան դերասանուհիներ Ալինա Մարտիրոսյանը և Ջուլիետա Ստեփանյանը: Նրանք այս պահին Հանրապետության հրապարակում են: Ալինա Մարտիրոսյանը հայտարարեց. «Մենք ընդունում ենք որպես վարչապետ Նիկոլին, միայն Նիկոլին: Ես հիմա կոչ եմ անում շոու-բիզնեսի ներկայացուցիչներին` վեր կացեք, եկեք ստեղ, ժողովուրդի կողքին եղե′ք: Դեն նետեք Ձեր մեդալները, դրանով չեք սիրվելու: Ժողովրդի սերը պիտի վայելեք, ոչ թե մեդալները կախեք, նստեք տանը: Սա ձեր համար սերիալ չի, նստում նայում եք»: Ջուլիետա Ստեփանյանն էլ ասաց. «Մեր Հայաստանը եղել է, կա միշտ էլ կլինի: Ես ուզում եմ մեր հայ ազգին ասել, որ դուք այսքան ազնիվ, անաղարտ, միասնական կաք այսօր ու կլինեք վաղը: Ես հպարտ եմ, որ հայ եմ ու այս ազգի մի փոքրիկ մասնիկն եմ, բնականաբար, ձեզ հետ եմ, կամ ու կլինեմ: Ես այսօր ապշած եմ մի փաստից, որ ունենք այսպիսի հզոր տղամարդ--երիտասարդություն, ես երջանիկ եմ դրա համար, այս երիտասարդությունը մի փոքրիկ օրինակով բնութագրեմ, նա այն սերմն է, որ ժայռի վրա էլ գցես, պտղատու ծառ կաճի, միշտ մնացեք այդպիսին սիրելիներս: Ես որպես մայր ու որպես տատ ուզում եմ բացել սիրտս ու բոլորիդ տեղավորել սրտիս մեջ: Շնորհակալ եմ ձեզ, միշտ եղեք այդպես քաջ ու ազնիվ»: