Թրամփի անսպասելի քայլը. նա զիջման գնաց Պուտինին

Սպիտակ տունը հետաձգեց հակառուսական նոր պատժամիջոցները Ըստ ամենայնի, ԱՄՆ նախագահը որոշել է չհատել կարմիր գիծը՝ Մոսկվայի հետ պահել բանակցությունների հնարավորությունը: Թրամփն անսպասելի որոշում կայացրեց նախօրեին: ԱՄՆ նախագահ Դոնալդ Թրամփը որոշեց միառժամանակ չսահմանել Ռուսաստանի նկատմամբ լրացուցիչ պատժամիջոցներ: Նախօրեին ենթադրվում էր, որ ԱՄՆ ֆինանսների նախարար Սթիվեն Մնուչինը կհրապարակի նոր պատժամիջոցների ցանկը: Կիրակի օրը նոր պատժամիջոցների մասին հայտնել էր ՄԱԿ-ում ԱՄՆ դեսպան Նիքի Հեյլին: Սպիտակ տան անանուն աղբյուրը Reuters լրատվական գործակալությանը հայտնել է, որ Թրամփը, հավանաբար, կընդունի նոր պատժամիջոցների որոշումն այն դեպքում, եթե Ռուսաստանի կողմից արվեն ապակայունացնող նոր քայլեր, այդ թվում, եթե ի հայտ գան հաքերային նոր գրոհների հետ ռուսների առնչության ապացույցներ կամ ագրեսիվ գործողություններ Սիրիայում: «Դեսպան Հեյլին, կարծես, այս անգամ իրադարձություններից մի քիչ առաջ անցավ»,- ասել է անանուն աղբյուրը: Ըստ Reuters-ի, Սպիտակ տունը մտահոգված է, որ նոր պատժամիջոցների սահմանումը կվտանգի միջազգային այլ ոլորտներում Ռուսաստանի հետ համակարգված քաղաքականության մշակումը մի ժամանակաշրջանում, երբ ռուս-ամերիկյան հարաբերություններում ամենալուրջ ճգնաժամն է «սառը պատերազմից» հետո: Նկատենք, որ Կրեմլը բավական նյարդային էր մեկնաբանել նոր պատժամիջոցների հնարավորությունը: Նախագահ Վլադիմիր Պուտինի խոսնակ Դմիտրի Պեսկովն ասել է, որ նոր պատժամիջոցների նախաձեռնությունը «ոչ մի կապ չունի Սիրիայի իրավիճակի հետ»: Մոսկվան հայտարարել է, որ անպայման կընդունի պատասխան կոշտ միջոցներ այն դեպքում, եթե Վաշինգտոնն ի վերջո որոշի նոր պատժամիջոցներ սահմանել: Սպիտակ տան խոսնակ Սարա Սանդերսն, այնուամենայնիվ, ընդգծել է, որ պատժամիջոցների խնդիրը մնում է օրակարգում: «Մենք քննարկում ենք Ռուսաստանի նկատմամբ լրացուցիչ պատժամիջոցների հնարավորությունը, որոշումը կընդունվի մոտ ապագայում»,- ասել է Սանդերսը: Ինչու էր ԱՄՆ-ը պատրաստվում ՌԴ-ի դեմ նոր պատժամիջոցների ՄԱԿ-ում Միացյալ Նահանգների մշտական ներկայացուցիչ Նիկի Հեյլին օրերս հայտնեց, որ Վաշինգտոնը մտադիր է հայտարարել նոր հակառուսական պատժամիջոցների մասին: Այս անգամ Վաշինգտոնը Մոսկվային պատժում է Սիրիայի գործող նախագահ Բաշար ալ-Ասադին աջակցելու համար: Պատժամիջոցների մասին պետք է հայտարարեր ԱՄՆ ֆինանսների նախարար Սթիվեն Մնուչինը: CBS-ին տված հարցազրույցում Հեյլին ընդգծել էր, որ նոր պատժամիջոցները սահմանվում են ռուսաստանյան այն ընկերությունների նկատմամբ, որոնք աջակցում են Ասադի ռեժիմին և ունեն որոշ կապեր քիմիական զենքի հետ: ՄԱԿ-ում ԱՄՆ-ի դեսպանը հերթական անգամ ընդգծել էր, որ Մոսկվան իր պատասխանատվության չափաբաժինն ունի Ասադի ուժերի կողմից քիմիական զենք օգտագործելու հարցում: Հիշեցնենք, ավելի վաղ՝ մեկ շաբաթ առաջ, ԱՄՆ-ը նոր պատժամիջոցներ էր սահմանել 38 ռուսաստանցի գործարարների, պաշտոնատար անձանց և ռուսական ընկերությունների նկատմամբ, ինչի հետևանքով ռուսաստանցի օլիգարխները 16 միլիարդ դոլարից ավելի գումար են կորցրել երկու օրում, իսկի ռուսական արժույթն էլ մեկ օրում էապես էժանացել էր: Ռուսաստանի Պետդումայի խոսնակ Վյաչեսլավ Վոլոդինը, հիշեցնենք, ապրիլի 12-ին Դումա էր ներկայացրել ԱՄՆ-ի դեմ պատասխան պատժամիջոցների օրինագիծ, որը նախատեսում էր արգելել կամ սահմանափակել ամերիկյան մի շարք ապրանքների, այդ թվում՝ ալկոհոլի և ծխախոտի, տեխնոլոգիական սարքավորումների ու համակարգչային ծրագրերի, գյուղատնտեսական ապրանքների, հումքի, սննդամթերքի և դեղորայքի ներմուծումը Ռուսաստան: Նախագծի հեղինակներն առաջարկում են նաև դադարեցնել համագործակցությունը ԱՄՆ-ի հետ միջուկային արդյունաբերությունում, օդանավաշինությունում, հրթիռային արդյունաբերությունում: Կազմվելու է նաև ԱՄՆ «անցանկալի» քաղաքացիների ցուցակ, որոնց մուտքը Ռուսաստան արգելվելու է: Իսկ ռուսաստանյան հեռուստաընկերություններն արդեն մի քանի օր էր, ինչ հանգստացնում էին ռուսաստանցիներին, թե նրանք կկարողանան նորմալ ապրել և առանց ամերիկյան ապրանքի: Ավելին՝ Պետդումայի որոշ պատգամավորներ կոչ էին արել մոռանալ քաղաքակիրթ աշխարհում ընդունված բոլոր օրենքներն ու կանոնները և Ռուսաստանում սեփական ուժերով ամերիկյան ապրանքներ արտադրել: «Ռուսները փորձում են ձախողել քիմիական գրոհի հետաքննությունը» Վաշինգտոնը Մոսկվային մեղադրում է Սիրիայում քիմիական զենքի կիրառման հետաքննությունը ձախողելու փորձերի մեջ: Այն, որ ռուսներն առաջինն են մուտք գործել քիմիական գրոհի ենթարկված Արևելյան Գուտա՝ ինքնին անբարենպաստ է քիմիական զենքի արգելման միջազգային կազմակերպության փորձագետների աշխատանքի համար: Այս մասին հայտարարել է կազմակերպությունում ԱՄՆ ներկայացուցիչ Քեննեթ Ուորդը: Նրա պնդմամբ՝ ներխուժելով Արևելյան Գուտա, ռուսները, ամենայն հավանականությամբ, ոչնչացրել են քիմիական գրոհի հետքերը: «Մենք մտահոգված ենք, որ ռուսները կարող էին դիմել խաբեության, ամեն բան անել՝ քիմիական զենքի արգելման կազմակերպության աշխատանքը խափանելու համար»,- կառույցի դռնփակ նիստում ասել է Ուորդը: Նրա խոսքերով, կազմակերպությունը խստորեն դատապարտում է «քիմիական ահաբեկչության մեթոդով ղեկավարելու՝ Սիրիայի վարչակարգի գործելակերպը»: Կազմակերպությունը հայտարարել է, որ ռուսական կողմը խոչընդոտել է փորձագետների մուտքը Գուտա: Ռուսներն այդ մեղադրանքը հերքում են: Քիմիական գրոհը, ենթադրաբար, տեղի է ունեցել ապրիլի 7-ին: Դրա իսկությունը հաստատող տեսահոլովակը տարածել է «Սպիտակ սաղավարտներ» իրավապաշտպան կազմակերպությունը, սակայն ռուսները պնդում են, որ այդ տեսահոլովակում ներկայացված դրվագները «բեմականացված են»: Ըստ «սպիտակ սաղավարտների», քիմիական գրոհի հետևանքով զոհվել է ավելի քան 50 մարդ: Ի պատասխան դրան, ԱՄՆ-ը, Մեծ Բրիտանիան և Ֆրանսիան համատեղ ռազմական գործողություն են իրականացրել՝ հրթիռային հարվածների ենթարկելով տասնյակ սիրիական թիրախներ, որոնք, ըստ արևմտյան զինվորական փորձագետների, առնչություն ունեն Բաշար Ասադի քիմիական զենքի ստեղծման և արտադրության հետ: Կարո՞ղ է ՌԴ մշտապես պաշտպանել Ասադին «Մեր կողմից դա ուժի ցուցադրում չէր, մենք սիրիացիների քիմիական զենքի ծրագիրը տարիներով ետ շպրտեցինք»,- երեք երկրների համատեղ օդային գործողության մասին ասել է ՄԱԿ-ում ԱՄՆ-ի դեսպան Նիքի Հեյլին: Նրա պնդմամբ, արևմտյան դաշինքը հստակ ուղերձ է հղել Սիրիայի նախագահ Ասադին և նրա պաշտպան Մոսկվային առ այն, որ քիմիական գրոհներն անպատասխան չեն մնա: Հեյլին համոզված է, որ ռուսները չեն կարող անվերջ պարտակել Ասադի հանցագործությունները. «Հիմա արդեն Ասադից է կախված՝ արդյո՞ք նա հարկ եղած չափով խելացի է այդ ուղերձն ըմբռնելու համար»,- ասել է ՄԱԿ-ում ԱՄՆ-ի դեսպանը: Հեյլին մերժել է ԱՄՆ-Սիրիա ուղիղ բանակցությունների հնարավորությունը՝ «Մենք երբևէ չենք ցանկանա այս շրջանում բանակցել Սիրիայի հետ, նրանք [Ասադի ռեժիմը] արժանի չեն դրան»,- ասել է ՄԱԿ-ում ԱՄՆ դեսպանը: Մետաքսյա Շալունց