Սերժ Սարգսյանը «բռնապետ է, որից պետք է երկիրն ազատվի առավելագույնս շուտ». Եվրոպայի հայերի միության ֆորում
Եվրոպայի հայերի միության ֆորումի (ԵՀՄՖ) նախագահությունը հանդես է եկել Երեւանում Սերժ Սարգսյանի վարչապետության դեմ տեղի ունեցող ցույցերի վերաբերյալ հայտարարությամբ՝ Սերժ Սարգսյանին անվանելով «բռնապետ, որից պետք է երկիրն ազատվի առավելագույնս շուտ»: «Հիմք ընդունելով այն փաստը, որ Հայաստանը ստորագրել է «Եվրամիության հետ համապարփակ և ընդլայնված գործընկերության մասին» համաձայնագիրը, որն օրեր առաջ միաձայն վավերացվել է ՀՀ խորհրդարանի կողմից, Եվրոպայի հայկական միությունների ֆորումի (ԵՀՄՖ) նախագահությունը սկսել է գործընթաց՝ դիմելով Եվրամիությանը (ԵՄ) և Եվրոպայի խորհրդի խորհրդարանական վեհաժողովին (ԵԽԽՎ)՝ քննարկելու Հայաստանում ստեղծված իրավիճակը և գնահատելու երկրի առաջին դեմքի աթոռը տասնամյակ ի վեր բռնազավթած անձի՝ Սերժ Սարգսյանի լեգիտիմության խնդիրը, քանի որ բռնապետությունը չի կարող եվրաընտանիքի մաս կազմել: ԵՀՄՖ-ն իր դիումի մեջ հստակ նշել է, որ խնդիրը ներհայաստանյան չէ և նախազգուշարել եվրոպական կառույցներին, որ ներկայումս չսանձելով բռնապետ Սերժ Սարգսյանին՝ Եվրոպան պետք է պատրաստվի մոտ ապագայում քաղաքական ապաստան հայցող ՀՀ քաղաքացիների հոծ բազմության հոսքին: Անօրինականությունների շարքը սկսվել է նրա առաջին նախագահական ընտրությունների ժամանակ՝ ցուցարարների վրա կրակելով, որի արդյունքում ունեցել ենք տաս զոհ: Մինչ այսօր նրա կողմից կազմակերպված բոլոր ընտրություններն անցկացվել են բացառիկ կեղծիքներով: Ամենասարսափելին նախագահական երկու ընտրություններից հետո նրա կողմից կազմակերպված երկրի կառավարման համակարգի փոփոխությունն էր, որի միակ նպատակը վարչապետի աթոռը զավթելը և ցմահ իշխանության ղեկին մնալն էր: Համատարած կոռուպցիայի և արդարադատության իսպառ բացակայության պայմաններում երկրի տնտեսությունը ոչնչացվել է և երկիրը հայտնվել քրեական ծագում ունեցող օլիգարխների ձեռքերում, որոնք մի մարդու պես ծառայում են բուրգի գագաթին հայտնված ամենաքրեածին օլիգարխին՝ Սերժ Սարգսյանին: Վերլուծելով կատարվածը՝ ԵՀՄՖ-ը հայտարարում է, որ Հայաստանում ստեղծվել է դասական բռնապետական համակարգ, որի պատասխանատուն բուրգի գագաթին թառած նախկին նախագահ և այսօր իրեն վարչապետ հայտարարած անձն է՝ Սերժ Սարգսյանը: Նման իրավիճակում, համաձայն միջազգային օրենքների, ժողովուրդը բռնի ուժով բռնապետի գրծունեությունը կասեցնելու և ժողովրդավարական համակարգի անցնելու իրավունք ունի: Այսօր վերջապես ողջ աշխարհի հայությունը ոտքի է կանգնել և պահանջում է իշխանափոխություն: ԵՀՄՖ-ը նախապատրաստվում է անցնել վճռական պայքարի և կոչ է անում ողջ հայությանը համախմբվելու՝ վերջին հարվածը հասցնելու ազգադավ վարչակարգին, կասեցնելու ոչ լեգիտիմ վարչապետի և նրա դրածո նախագահի գործունեությունը և անհրաժեշտության դեպքում միջազգային դատարան ներկայացնելու բռնապետի բոլոր հայտանիշներն ունեցող հանցագործին՝ Սերժ Սարգսյանին», - ասված է հայտարարության մեջ:
Հետևեք մեզ Viber-ում
