Քոչարյանը մեղմում է իրավիճակը

Հայաստանի երկրորդ նախագահ Ռոբերտ Քոչարյանը շնորհավորել է Սերժ Սարգսյանին վարչապետ ընտրվելու կապակցությամբ։ Քոչարյանի գրասենյակը ներկայացրել է երկրորդ նախագահի մի քանի տողանոց ուղերձը ․«Հայաստանի նախագահ Ռոբերտ Քոչարյանը շնորհավորական ուղերձ է հղել Սերժ Սարգսյանին նախագահական ընտրություններում հաղթելու կապակցությամբ»։ Շնորհավորական այս աղքատիկ ուղերձը ուշագրավ է ոչ միայն 2008 թվականից հետո Քոչարյան-Սարգսյան ակնհայտ լարված հարաբերությունների համատեքստում, այլ նաեւ Հայաստանում ներկայում ծավալվող իրադարձությունների ու նախօրեին խորհրդարանում Սերժ Սարգսյանի արած հայտարարության կապակցությամբ: Այն, որ Քոչարյան-Սարգսյան հարաբերություններում անջրպետը խորացել է այնքան, որ Քոչարյանը կարող էր անգամ չպահպանել ձեւականությունը, հաստատում է նախկին ուղերձների բովանդակային էվոլուցիան։ Օրինակ 2008-ին, երբ Քոչարյանը իշխանությունը փոխանցեց Սարգսյանին ու մեծ հույսեր ուներ նշանակվել վարչապետի պաշտոնում՝ կրկնելով Ռուսաստանի մոդելը, Քոչարյանի տարածած ուղերձն ուներ այսպիսի բովանդակություն․«Սրտանց շնորհավորում եմ Ձեզ 2008 թվականի նախագահական ընտրություններում տարած համոզիչ հաղթանակի կապակցությամբ: Ազատ եւ արդար ընտրություններում Ձեր ստացած քվեն Հայաստանի Հանրապետության արագընթաց զարգացմանն ու ժողովրդավարացմանը միտված բարեփոխումների շարունակականության քվեն է: Հայաստանի տնտեսության աճի տեմպերի պահպանումը, աղքատության հաղթահարումն ու կյանքի նոր որակի ապահովումը, Հայաստանի միջազգային ներգրավվածության խորացումը, Լեռնային Ղարաբաղի հակամարտության արդար եւ վերջնական կարգավորումը Ձեր առջեւ ժողովրդի կողմից դրված բազմաթիվ խնդիրներից միայն մի քանիսն են: Վստահ եմ, որ Դուք Ձեր բոլոր գիտելիքներն ու հմտությունները ներդնելու եք այդ նպատակների իրականացման գործում: Համոզված եմ, որ Ձեր պաշտոնավարման առաջիկա տարիները կնշանավորվեն պետության կայունության ամրապնդմամբ եւ հասարակության ներսում հանդուրժողականության խորացմամբ: Հայաստանը օժտված է բացառիկ մարդկային ներուժով, որը պետք է լիարժեք ծառայի մեր Հայրենիքի առաջընթացին: Մաղթում եմ Ձեզ քաջառողջություն, եռանդ եւ ուժ` պետության բարձրագույն պաշտոնում ժողովրդին Ձեր ծառայությունները մատուցելու համար»: 2013-ին, երբ արդեն անջրպետը գցված էր, Քոչարյանի շնորհավորական ուղերձը բառացիորեն կրկնում էր այսօրվա բովանդակությունը։ Մինչդեռ 2017-ի խորհրդարանի ընտրությունից առաջ Քոչարյանը հայտարարեց, թե Հայաստանում քաղաքականությունը զիջել է փողին, եւ ինքը չի ցանկանում գործ ունենալ այդ ամենի հետ: Իսկ Սերժ Սարգսյանի վարչապետությունն այդ ամենի արդյունք է, հետեւաբար Քոչարյանի շնորհավորանքը հետաքրքիր է: Չի բացառվում, որ նա շտապել է Սերժ Սարգսյանին հավաստիացնել, որ ինքը կապ չունի իր ակնարկած «հանգած հրաբխի» եւ բզբզոցի հետ։ Հիշեցնենք, որ Էդմոն Մարուքյանին ուղղված խոսքում Սերժ Սարգսյանը երեկ ուշագրավ հայտարարություն արեց, ասելով՝ լուսավոր, բարգավաճ, զարգացող Հայաստան ունենալու համար պետք է, որ հանգած հրաբուխները չարթնանան, իսկ դրանք չեն արթնանա, եթե ոմանք չբզբզեն։ Մամուլում լուրեր տարածվեցին, թե «հանգած հրաբուխները» ՀՀԿ-ից տարբեր առիթներով հեռացած նախկին իշխանավորներն են՝ Ռոբերտ Քոչարյանը, Հովիկ Աբրահամյանը, Սեյրան Օհանյանը։ Իհարկե , չի բացառվում, որ իշխանությունը լուրջ վախեր ունի նախկիններից եւ հենց ինքն է տարածում այդ տեղեկությունները, սակայն քիչ հավանական է, որ այսօր ծավալվող պայքարից նշված մարդիկ փորձեն օգտվել ու ստվերային աջակցություն ցուցաբերել Նիկոլ Փաշինյանին։ Ինչի վկայությունը Քոչարյանի շնորհավորանքն է, սպասենք-տեսնենք, թե ինչ միջոցներով կբացառեն իրենց կապը նաեւ մյուսները։ Անի Սահակյան