Արտակարգ դեպք Լոռու մարզում

SHAMSHYAN.com-ի տեղեկություններով՝ Հայաստանի քննչական կոմիտեի Լոռու մարզային քննչական վարչության Թումանյանի քննչական բաժնում նյութեր են նախապատրաստվում երեկ՝ ապրիլի 16-ին, Ալավերդի համայնքի բնակիչ՝ 55-ամյա Մհեր Վարդանյանի դիմումի փաստով։ Ինչպես հայտնում է ֆոտոլրագրող Գագիկ Շամշյանը, վերջինս ոստիկանության Թումանյանի բաժին հայտնել է, որ ապրիլի 12-ին, ժամը 14։00-ից մինչև նույն օրը, ժամը 17։00-ն ընկած ժամանակահատվածում Վրաստանի սահմանից մոտ 500 մետր հեռավորության վրա գտնվող Ջիրիզա գյուղի «Արմուտ դար» կոչվող հանդամասից կորել են առանց հսկողության թողնված իրեն պատկանող 9 գլուխ խոշոր եղջերավոր անասունները։ Ֆոտոլրագրողի տեղեկություններով՝ Մ. Վարդանյանը Ջիրիզայի վարչական շրջանի ղեկավարն է և ոստիկաններին տեղեկացրել է նաև, որ իրենց ուժերով փորձել են փնտրել անասուններին, սակայն չեն գտել։ Նա հայտնել է նաև, որ հայ-վրացական սահմանին նկատել են անասունների ոտնահետքեր և չի բացառել, որ հնարավոր է՝ անասունները գողացել են։ Ֆոտոլրագրողի տեղեկություններով՝ վարչական շրջանի ղեկավարը կրել է մոտ 4 մլն դրամի նյութական վնաս։ Ոստիկանություն ու քննչական բաժինը ձեռնարկում են անհրաժեշտ միջոցառումներ՝ հանգամանքները պարզելու, ինչպես նաև անասուններին հայտնաբերելու ուղղությամբ։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: