Կմիանա՞ն Արամ Սարգսյանն ու Էդմոն Մարուքյանը Նիկոլ Փաշինյանին

Ուզում եմ ձեր անունից, նաև իմ անունից, Ազատության հրապարակի հարթակից համերաշխության ձեռք մեկնել Հայաստանի բոլոր ընդդիմադիր քաղաքական ուժերին, Ազատության հրապարակի հարթակից հայտարարեց Նիկոլ Փաշինյանը։«Համերաշխության ձեռք եմ մեկնում բոլոր նրանց, ովքեր երբևէ պայքար են մղել Սերժ Սարգսյանի և նրա ապօրինի իշխանության դեմ։ Սիրելի գործընկերներ, այո՛, մենք այս ընթացքում բազմաթիվ հակասություններ ենք ունեցել։ Շատ վիճել ենք, կռվել ենք, երբեմն վիրավորել ենք նաև իրար, բայց կարծում եմ, որ ժամանակն է, որ մենք հանուն մեր ժողովրդի ի վերջո հավաքվենք Ազատության հրապարակում և ներենք իրար», - հայտարարեց Նիկոլ Փաշինյանը: Նա գիտի, որ տարբեր մարդկանց ու տարբեր քաղաքական գործիչների նկատմամբ կան վերապահումներ։ ՀՀ-ում չկա որևէ քաղաքական գործիչ, որի մասին հնարավոր չլինի բազմաթիվ սխալներ մատնանշել։ «Բայց չմոռանանք, որ մենք ծառայում ենք ժողովրդին, և ուզում եմ կոչով դիմել այս հրապարակում կանգնած ժողովրդին։ Խնդրում եմ որևէ մեկնաբանությամբ, որևէ արտահայտությամբ չխոչընդոտել Հայաստանի բոլոր ընդդիմադիր ուժերի միավորմանը»։ Փաշինյանն առանձնահատուկ ուղերձ հղեց «Ելք» դաշինքի գործընկերներին՝ «Հանրապետություն» և «Լուսավոր Հայաստան» կուսակցություններին։ «Սիրելի գործընկերներ, ես գիտեմ, որ մենք միասնական ենք հանուն երջանիկ ապագայի, հանուն ազատ Հայաստանի։ Ահա Ազատության հրապարակը լեփ-լեցուն է, Ազատության հրապարակում մենք ուզում ենք ձեզ տեսնել մեր կողքին»: Նա հավաքվածներին ասաց, թե գիտի, որ տարբեր մարդկանց ու տարբեր քաղաքական գործիչների նկատմամբ կան վերապահումներ։ Նրա խոսքով՝ ՀՀ-ում չկա որևէ քաղաքական գործիչ, որի մասին հնարավոր չլինի բազմաթիվ սխալներ մատնանշել։ Ելք-ում ինչպես հայտնի է փողոց դուրս գալ-չգալու հարցը բարիկադներ գցեց դաշինքի երեք գործընկերների միջեւ, մի կողմում Նիկոլ Փաշինյանն է, մյուսում՝ Էդմոն Մարուքյանն ու Արամ Սարգսյանը, որոնք հայտարարում էին ինստիտուցիոնալ գործունեության նախապատվության մասին ՝ չթաքցնելով թերահավատությունը, որ ժողովուրդը փողոց դուրս կգա: Նրանք մի քանի անգամ հայտարարեցին, թե չեն մերժում փողոցային պայքարը, սակայն կարծում են, որ պահն այս չի հասունացել եւ չկա փողոց դուրս գալու հանրային պահանջ: Մինչդեռ մեկնարկային հանրահավաքը ի դերեւ հանեց այս կասկածները եւ հրապարակում տարբեր գնահատականներով 8-10 հազար մարդ էր կանգնած: Եւ սա այն պարագայում, երբ Ելք-ում չկա միասնականություն, ինչն ավելի է ջլատում պայքարի տրամադրությունները: Կգա՞ն արդյոք Փաշինյանի դաշինքային գործընկերները հրապարակ, թե ոչ, դժվար է ասել: Սակայն պատահական չէ այն ընդգծումը, որ հրապարակը լեփ-լեցուն է: Բանն այն է, որ մի քանի առիթով հատկապես Արամ Սարգսյանը հայտարարել է, թե ինքը չի կարող մերժել փողոցային պայքարը:<<Հանրությունը պետք է պատվիրակի մեզ փողոց դուրս գալ, երբ դուրս գա մենք կհայտնվենք փողոցում>>, շաբաթներ առաջ Ազատության եթերում ասում էր նա, մեկ ուրիշ առիթով էլ նշել ՝ երբ ժողովուրդը տեսնի, որ «Ելք»-ն այլընտրանք է իշխանությանն, էդ դեպքում փողոց դուրս կգա.«Խնդիրը նրանում չի, որ հասարակությունն ինքնաբուխ փողոց է դուրս գալու, մենք էդպիսի բան չենք ասում, մենք աշխատանք ենք անում, որ հասարակությունը փողոց դուրս գա։ Օրինակ այդ երկու երթն էլ /նկատի է ունեցել թանկացումների համար հասարակությանը փողոց հանելու, Ազգային ժողովում մեր ելույթները, Սերժ Սարգսյանի նախկին արած հայտարարությունները հիշեցնելը, տեսակետ ասելը, որ թե՛ Սերժ Սարգսյանը, թե՛ Բակո Սահակյանը երկրորդ, երրորդ անգամ առաջադրվելով լուրջ խնդիրներ են առաջացնում»: Եթե այս բազմությունն էլ Ելք-ի մյուս լիդերների եւ մանավանդ Արամ Սարգսյանի համար ժողովուրդ չի ընկալվի եւ նա դուրս չի գա փողոց, ապա կարելի է այսուհետ չկասկածել, որ իշխանության մատը խառն է նրանց գործում:   Անի Սահակյան