Սպիտակ տունը կզղջա՝ զգուշացնում է Թեհրանն ու սպառնում երկրի երեսից մաքրել Թել-Ավիվն ու Հայֆան

Հարեւան Իրանի շուրջ ուշագրավ իրադարձություններ են ընթանում: Երեկ ԵՄ-ն երկարաձգեց Իրանի դեմ պատժամիջոցները մինչև 2019թ. ապրիլի 13-ը: Որոշումն ընդունվել է՝ ի պատասխան Իրանում մարդու իրավունքների ոտնահարման և էական խախտումների: Ընդունված սահմանափակումները ներառում են 82 անձանց և մեկ կազմակերպության ակտիվների մուտքի և ժամանակավոր չեզոքացման թույլտվություն: Մասնավորապես, սառեցվել է սարքավորումների արտահանումը Իրան,  եթե առկա է ներքին ռեպրեսիաների համար օգտագործման հավանականությունը, ինչպես նաև հեռահաղորդակցության մոնիտորինգի սարքերը: ԱՄՆ պետքարտուղարի պաշտոնի թեկնածու Մայք Պոմպեոն Սենատում նշել է, որ ցանկանում է փոխել Իրանի միջազգային միջուկային համաձայնագիրը: Նա հավելել է, որ ԱՄՆ-ը կաշխատի իր դաշնակիցների հետ լավագույն արդյունքների և լավագույն գործարքի ստացման համար: 2015թ. ստացված համաձայնության արդյունքում կասեցված ամերիկյան պատժամիջոցները, որոնք հայտնի են որպես Միացյալ համապարփակ գործողությունների ծրագիր, կվերսկսվեն, եթե Թրամփը կրկին չհրաժարվի դրանցից մայիսի 12-ին: Պոմպեոն նաև ասել է, որ նա միևնույն է առավել կոպիտ գործարք է պնդելու նույնիսկ այն դեպքում, եթե Թրամփը որոշի չհրաժարվել պատժամիջոցներից: ԱՄՆ-ը, քննարկելով Իրանի հանդեպ նոր պատժամիջոցներ մտցնելու հնարավորության հարցը, ուշադիր հետևում է ողջ աշխարհում, հատկապես Սիրիայում նրա վարքագծին: Այս մասին օրերս նշեց ԱՄՆ ներկայացուցիչների պալատում ծախսերի մասով կոմիտեի լսումներում նշեց ֆինանսների նախարար Սթիվեն Մնուչինը: Թեհրանի պատասխանը ամերիկյան քաղաքականությանը բավական կոշտ է: Իրանի նախագահ Հասան Ռուհանին նշել է, որ Սպիտակ տունը կզղջա, եթե որոշի դուրս գալ Իրանի միջուկային ծրագրից. «Իրանը չի խախտի միջուկային գործարքը, բայց եթե ԱՄՆ-ն դուրս գա համաձայնագրից, նա անկասկած կզղջա այդ մասին։ Մեր պատասխանն ավելի հզոր կլինի, քան կարող է պատկերացնել»։ Հիշեցնենք․ 2015թ. հուլիսին ՄԱԿ-ի ԱԽ 5 մշտական անդամները՝ Ռուսաստանը, Ֆրանսիան, ԱՄՆ-ն, Մեծ Բրիտանիան, Չինաստանը՝ Գերմանիայի հետ միասին Իրանի միջուկային հարցի կարգավորման շուրջ համաձայնության են հանգել։ Դրա համաձայն՝ Իրանն ազատվում է միջուկային ծրագրի հետ կապված բոլոր պատժամիջոցներից՝ պայմանով, որ Թեհրանն ինքը սահմանափակի այդ ծրագիրը։ Համաձայնագրի պայմանները անդամ երկրներն ամփոփել են Գործողությունների համատեղ համընդգրկուն ծրագրում։ Գործարքն ուժի մեջ է մտել 2016-ի հունվարից։ Իսկ Իրանի բարձրաստիճան հոգևորական Ահմադ Խաթամին քարոզի ժամանակ հայտարարել է, որ «Հեզբոլլահը» այնպիսի զենք ունի, որ կարող է ամբողջությամբ Իսրայելի երկու խոշոր քաղաք ոչնչացնել: Իր հայտարարությամբ Ահմադ Խաթամին մեկնաբանել է Իսրայելի կառավարության հաղորդագրություններն այն մասին, որ հաջորդ տարի հնարավոր է լուրջ հակամարտություն սկսվի «Հեզբոլլահի» հետ: Իրանական այաթոլլան հայտարարել է, որ 2006թ. Լիբանանյան պատերազմի ժամանակ Իսրայելն արդեն «փորձել է իր հնարավորությունը» և պարտություն է կրել: Եթե ուզում եք, որ երկրի երեսից մաքրենք Հայֆան ու Թել-Ավիվը, կարող եք նորից փորձել ձեր ուժերը… Մենք հրթիռներ ենք կառուցում, և մենք մեծացնելու ենք մեր հրթիռների հեռավորությունը, որպեսզի Սպիտակ տան բնակիչներին զրկենք հանգիստ քնից: Իրանցի հոգևորականը նշել է, որ Հայֆան ու Թել-Ավիվը «ուրվական քաղաքների» վերածելու համար օգտագործվելու է 70 կիլոմետրանոց շառավղով համազարկային կրակի ռեակտիվ համակարգը: Մետաքսյա Շալունց