Ալիևյան խաղեր

Այսօր մեկնարկել են Ադրբեջանի և Թուրքիայի ռազմաօդային ուժերի TURAZ Şahini-2016 համատեղ զորավարժությունները։ Երկու երկրների ռազմաօդային ուժերը զորավարժություններ են անցկացրել նաև անցած տարի։ Թուրքիայի Գլխավոր շտաբի հաղորդագրության համաձայն` երկու երկրների ռազմաօդային ուժերի համատեղ զորավարժությունները կանցկացվեն մարտի 7-25-ը։ Ադրբեջանի և Թուրքիայի ռազմաօդային ուժերի համատեղ զորավարժությունները մեկնարկեցին խորհրդանշական իրադարձությունների ֆոնին. ռուս պաշտոնյաներն այս օրերին Բաքվում էին: Ալիևը, կարծես, ձգտում է ցույց տալ, որ և՛ Անկարայի, և՛ Մոսկվայի հետ վարում է բալանսավորված քաղաքականություն: Մի քանի օր առաջ Բաքու էր մեկնել Ռուսաստանի փոխվարչապետ, Ռուսաստան-Ադրբեջան միջխորհրդարանական հանձնաժողովի նախագահ Դմիտրի Ռոգոզինին։ Հիշեցնենք, որ Կոմերսանտն օրերս հայտնեց, որ Ռուսաստանի ու Ադրբեջանի միջև ռազմատեխնիկական համագործակցության ոլորտում խնդիրներ են ծագել, որոնց կարգավորման համար էլ Ռոգոզինը մեկնել է Բաքու։ Նշվում էր, թե նավթի գնանկման պատճառով Ադրբեջանն ի վիճակի չէ վճարումներ կատարել ավելի վաղ կնքած զենքի մատակարարումների պայմանագրերով։ Ահա, Ալիևի հետ վարած հաջող բանակցություններից հետո Ռոգոզինն ամփոփել է իր ադրբեջանական այցի արդյունքները: Ռուսաստանն ու Ադրբեջանը պատասխանատու ու հուսալի գործընկերներ են ռազմատեխնիկական համագործակցության ոլորտում, Twitter-ի իր միկրոբլոգում գրել է Ռուսաստանի փոխվարչապետ Դմիտրի Ռոգոզինը: Իսկ Ալիևը նշել է, որ երկու երկրների միջև շատ ոլորտներում իրականացվում է հաջող համագործակցություն։ Նա ընդգծել էր Ռուսաստանին մթերքների մատակարարման ոլորտում Ադրբեջանի աճող դերը։ Մյուս պաշտոնյան, որը Բաքվում էր` Ռուսաստանի փոխարտգործնախարար Գրիգորի Կարասինն էր: Նա էլ գոհ է Ադրբեջանի արտգործնախարար Էլմար Մամեդյարովի հետ հանդիպման արդյունքներից։ Կարասինը հայտնել է, որ հանդիպման ժամանակ քննարկվել են նաև Հարավային Կովկասի երկրների հետ հարաբերությունների հարցը, ինչը եղել է արդյունավետ. «Մենք Ադրբեջանի արտգործնախարար Էլմար Մամեդյարովի հետ քննարկեցինք երկկողմ հարաբերությունները, քաղաքական մակարդակով առաջիկա հանդիպումների գրաֆիկը։ Բնականաբար, մենք քննարկեցինք տարածաշրջանային խնդիրները, Հարավային Կովկասի հարցերը, տարածաշրջանային երկրների հետ մեր հարաբերությունները։ Հանդիպումը ստացվեց շատ կառուցողական, արդյունավետ ու հետաքրքիր»։ Կարասինի խոսքերով՝ առանձին ուշադրություն է հատկացվել ԼՂ խնդրի կարգավորման թեմային: Ալիևը շարունակում է Ռուսաստանի ու Թուրքիայի հետ հարաբերությունները կառուցել վստահության պահպանման հիմքում: Նա ամեն ինչ անում է, որպեսզի երկու երկրները շարունակեն Ադրբեջանին համարել տարածաշրջանի հիմնական խաղացող` էներգետիկ, ռազմական, առևտրատնտեսական ոլորտներում: Թամար Բագրատունի