Թրամփը հայտարարել է Սիրիայում «կետային հարվածներ» հասցնելու սկզբի մասին

«Վեդոմոստին» փոխանցում է,որ ԱՄՆ նախագահ Դոնալդ Թրամփն իր հեռուստատեսային ուղերձում հայտարարել է, որ սկսել է Սիրիայում «կետային հարվածներ» հասցնել՝ ի պատասխան Սիրիայի Դումա քաղաքում անցած շաբաթ ենթադրական  քիմիական հարձակմանը: «Գործողությունն իրականացվում է Մեծ Բրիտանիայի ու Ֆրանսիայի զինված ուժերի հետ համատեղ։Ես հրամայեցի ԱՄՆ զինված ուժերին սկսել կետային հարվածներն այն օբյեկտներին, որոնք առնչություն ունեն Սիրիայի բռնապետ Բաշար Ասադի քիմիական զենքի հետ:Այդ արշավի նպատակն է «ստեղծել ուժեղ զսպող գործոն քիմիական զենքի արտադրության, տարածման ու գործածման դեմ»»,-ասել է Թրամփը: Նա դիմել է Ռուսաստանին ու Իրանին, որոնք աջակցում են Ասադի վարչակարգը․ «Իրանին ու Ռուսաստանին ես հարցնում եմ՝ « Ո՞ր ազգն է ուզում կապակցված լինել անմեղ տղամարդկանց, կանանց ու երեխաների զանգվածային սպանությունների հետ»,- ասել է Թրամփը  ։ Միաժամանակ Թրամփը նշել է, որ ԱՄՆ-ն կարող էր լավ հարաբերություններ ունենալ Ռուսաստանի ու Իրանի հետ, եթե այդ երկրները փոխեին իրենց դիրքորոշումը Սիրիայի մասով․ «Ռուսաստանը պետք է որոշի՝ արդյոք նա շարունակում է այս մութ ուղին»։ Թրամփը Ռուսաստանին կոչ է արել պատրաստվել Սիրիայի վրա հրթիռային հարվածի։ Նա խոստացել է, որ «այդ գազանություներին ամերիկյան, բրիտանական ու ֆրանսիական համատեղ պատասխանը» ներառելու է բոլոր գործիքները՝ «ռազմական, տնտեսական ու դիվանագիտական»։ Թրամփը հավելել է, որ հարվածները կշարունակվեն այնքան ժամանակ, քանի դեռ սիրիական վարչակարգը չդադարեցնի քիմիական զենքի գործածումը։ « ԱՄՆ-ն չի կարող գործել ամենուրեք, որտեղ բռնապետություն կա, սակայն Մերձավոր Արևելքը խնդրահարույց վայր է։ Մենք կձգտենք այն ավելի լավը դարձնել, բայց դա խնդրահարույց վայր է,- նշել է նա, - ԱՄՆ-ն գործընկեր ու ընկեր կլինի։ Բայց տարածաշրջանի ճակատագիրը նրա սեփական ժողովրդի ձեռքերում է»։