«Սերժ Սարգսյա՛ն, դու քանդել ես մեր առաջնագիծն ու անվտանգությունը, դրանո՞վ ես անփոխարինելի». Փաշինյան
Ազատության հրապարակում մեկնարկած հանրահավաքում ԱԺ պատգամավոր Նիկոլ Փաշինյանն իր ելույթում հիմնական շեշտը դրել է Սերժ Սարգսյանի ղեկավարած տարիների բացթողումները ջրի երես հանելու վրա: «ՀՀԿ-ի ու Սերժ Սարգսյանի մաֆիոզ իշխանությունից ազատագրվելու կարիք ունի ժողովուրդը, և մենք նվիրած ենք այդ ազատագրման նպատակին. այո, սա ազատագրության ժամն է: Մենք ՀՀ քաղաքացուն ասում ենք՝ սիրելի հայրենակից, քայլ արա, մերժիր Սերժին: Սերժ Սարգսյանն ապրիլի 9-ին հեռացել է իշխանությունից ու մեր խնդիրն է՝ թույլ չտալ, որ վերադառնա, դրա համար էլ ասում ենք՝ քայլ արա, մերժիր Սերժին»,- ասաց Փաշինյանը: Նա անդրադարձավ Սերժ Սարգսյանի փեսա Միքայել Մինասյանի պարգևներին, եղբոր՝ Ալեքսանդր Սարգսյանի պաշտոններին՝ հավելելով, որ Սերժ Սարգսյանը մտահոգված է սեփական ընտանիքի բարեկեցությամբ, այլ ոչ՝ ժողովրդի խնդիրներով: «Սերժ Սարգսյա՛ն, դու քանդել ես մեր առաջնագիծն ու անվտանգությունը, դրանո՞վ ես անփոխարինելի: Դու միայն կարողանում ես ապահովել քո անձնական անվտանգությունը զրահապատ մեքենայի մեջ, որի վրա ես 300 հատ թռուցիկ շպրտեցի»,- հավելեց նա:
Հետևեք մեզ Viber-ում
