Արի՛ հրապարակ. «Մենք ձեր հաղթանակը կապահովենք»
«Ժամանակ» թերթը գրում է. «Մերժիր Սերժին» նախաձեռնության՝ Երևանի Բրազիլիայի հրապարակից մեկնարկած իրազեկման ավտոերթը երեկ ուշ երեկոյան, ավարտելով երթը Երևանի կենտրոնական փողոցներով, միացավ մարտի 31-ին Գյումրի քաղաքից մեկնարկած և ընդհուպ Երևանին մոտեցած «Իմ Քայլը» նախաձեռնության քայլերթին: «Այսօր ժամը 13:00 մենք մուտք ենք գործում Երևան քաղաք, և այն քաղաքացիները, ովքեր ուզում են մեզ դիմավորել, մեզ հետ քայլել դեպի Ազատության հրապարակ, խնդրում ենք լինել Երևանի Հյուսիսային ավտոկայանի դիմաց, իսկ 18:30-ին՝ արդեն Երևանի Ազատության հրապարակում: Մենք այդ պատասխանատվությունը զգում ենք և հոգեբանորեն, բարոյապես, ինտելեկտուալ առումով, և քաղաքականապես մեզ պատրաստ ենք զգում ձեր հաղթանակը ապահովելու համար: Եկեք Ազատության հրապարակ, և մենք ձեր հաղթանակը կապահովենք»,- հայտարարել է «Իմ Քայլը» նախաձեռնության առաջնորդ Նիկոլ Փաշինյանը»: Առավել մանրամասն՝ թերթի այսօրվա համարում:
Հետևեք մեզ Viber-ում
