Պարտադրված հակառակորդ՝ ապագա 7 տարիների համար

Այսօր Ադրբեջանում նախագահական ընտրություններ են ընթանում: 125 ընտրական օկրուգներում 5426 մշտական և 215 շարժական ընտրատեղամասեր են գործում, բոլոր ընտրատեղամասերում տեղադրված են տեսախցիկներ: ԿԸՀ տվյալների համաձայն, ընտրությունների ընթացքին հետևելու են 894 միջազգային ու 58175 տեղական դիտորդներ, այդ թվում՝ 59 երկրի 61 կազմակերպությունից: Իլհամ Ալիևի վերընտրությունը կասկածից դուրս է: Օրերս հրապարակվեցին տեղական մի կազմակերպության՝ «Rey» հետազոտական կենտրոնի ապրիլի սկզբին իրականացրած հարցումների արդյունքները: Ըստ այդմ՝ հարցվածների 83,5 տոկոսը մտադիր է ձայնը տալ գործող նախագահ Իլհամ Ալիևին: Հիշեցնենք ՝ նախորդ ընտրություններին Իլհամ Ալիևը ստացել էր ձայների 84 տոկոսը, և հիմա, փաստորեն, ակնկալվում է նույն արդյունքը: Վերոհիշյալ հարցումներով ակնկալվում է նաև ընտրողների բարձր մասնակցություն․ հարցվածների 68 տոկոսը միանշանակորեն պնդել է, որ գնալու է քվեարկության, 10 տոկոսն ասել է, որ ավելի շուտ կմասնակցի, քան ոչ, և միայն հարցվածների 5 տոկոսը չի գնա քվեարկության: Իլհամ Ալիևից բացի առաջադրվել է ևս 7 թեկնածու: Ադրբեջանական ընդդիմությունը բոյկոտեց ընտրությունները: Առաջադրված թեկնածուներն իշխանամետ են համարվում․ նրանք, ըստ ընդդիմադիրների, առաջադրվել են մրցակցության պատրանք ստեղծելու համար: Ըստ հրապարակված հարցումների՝ նրանցից ոչ ոք անգամ 2 տոկոս քվեներ չի ստանա: Հարցվածների մեծ մասի կարծիքով ընտրություններն Ադրբեջանում կլինեն արդար և կարտահայտեն ժողովրդի կամքը: 38 տոկոսը չի բացառել, որ աննշան թերություններ լինեն, բայց դրանք էական ազդեցություն չեն ունենա արդյունքների վրա: Իլհամ Ալիևը պատրաստվում է չորրորդ անգամ դառնալ երկրի ղեկավար: Իշխանությունը պահելու համար նա իր երկրորդ նախագահության ժամկետից առաջ սահմանադրական փոփոխություններ նախաձեռնեց, բայց գնաց ոչ թե խորհրդարանական կառավարում հաստատելու ճանապարհով, այլ պարզապես վերացրեց նախագահական ընտրություններին 2 անգամից ավելի մասնակցության հնարավորությունը բացառող արգելքը: Հիշեցնենք, որ Ադրբեջանի նախագահական հերթական ընտրությունները պետք է տեղի ունենային գալիք հոկտեմբերին, բայց Իլհամ Ալիևն անսպասելիորեն որոշեց ընտրությունները վաղաժամկետ անցկացնել՝ ապրիլի 11-ին: Ընդդիմությունը չընդունեց այդ որոշումը և բոյկոտեց ընտրությունները: Փորձագետները, ինչպես նաև Ադրբեջանի արտգործնախարարը ընտրությունները վաղաժամկետ անցկացնելը կապել էին ղարաբաղյան հակամարտության կարգավորման հետ: Էլմար Մամեդյարովը մի քանի անգամ ասել էր, որ Ադրբեջանի և Հայաստանի ղեկավարների ընտրություններից հետո ղարաբաղյան բանակցություններն ավելի ակտիվորեն կշարունակվեն: Ի դեպ, նոր, փոփոխված կարգի համաձայն, նախագահն այսուհետ ղեկավարելու է ոչ թե 5, այլ 7 տարի: Բացի այդ, փոխվել է նաև առաջադրումների սահմանափակումը, նշանակում է՝ Ալիևը 7 տարի պաշտոնավարելուց հետո կարող է ամբողջ կյանքի ընթացքում առաջադրվել այնքան, որքան կկամենա: Ինչպես նախորդ ընտրություններում, այնպես էլ այս անգամ՝ անակնկալներ, իհարկե, չեն սպասվում. Իլհամ Ալիև հավերժական թեկնածուն իշխանությունը կպահի իր ձեռքում: 7 տարի՝ միանշանակ Հայաստանը ունենալու է հակառակորդ՝ ի դեմս Ալիևի՝ դրանից բխող բոլոր բացասական հետևանքներով՝ Լեռնային Ղարաբաղի խնդրից մինչև Հայաստանը մեկուսացնելու Բաքվի քաղաքականությամբ: Իսկ անկանխատեսելի գործընթացներ՝ ընդդիմության ամրապնդում և առավելևս հասարակական ընդվզում Ադրբեջանում, հազիվ թե, հնարավոր լինի սպասել առաջիկա յոթ տարիներին: Մետաքսյա Շալունց