Ադրբեջանը բռնապետություն է.դա Եվրոպային չի անհանգստացնում. Լեյլա Յունուս

« Ադրբեջանը հանրապետություն է, սակայն իրականում այն սուլթանություն է: Նախագահը՝ մեր բռնապետը, առաջին անգամ ընտրվել է 2003թ.: Այսօր Ադրբեջանում արդեն չկան անկախ իրավապաշտպաններ, լրագրողներ: Քաղբանտարկյալների մեր ցուցակում 161 մարդ կա, որոնց թվում 12 լրագրող եւ բլոգեր, մեկ պոետ եւ մեկ արձակագիր,որոնցից մի քանիսը բանտարկության մեջ են գտնվում արդեն շուրջ 20 տարի: Ռուսաստանում, որը Ադրբեջանի համեմատությամբ ավելի ուժգին քննադատության է ենթարկվում ԵՄ-ի կողմից, ավելի քիչ քաղբանտարկյալներ կան»,- ապրիլի 11-ին Ադրբեջանում նախագահական ընտրություններին համընթաց  Ալիեւի ռեժիմի գլխավոր ընդդիմադիրներից մեկը՝ Լեյլա Յունուսը, ֆրանսիական Liberation թերթին պատմում է ադրբեջանական բանտերում մշտապես կիրառվող կտտանքների մասին: «ԵԽ-ն , որի կազմի մեջ  է նաեւ Ադրբեջանը, հավանություն չի տվել նրա հանդեպ ոչ մի պատժամիջոցի, թեպետ համարում է իրեն մայրցամաքի գլխավոր իրավապաշտպան կազմակերպությունը: Նոյեմբերին Ալիեւը եկավ Բրյուսել եւ հանդիպեց Ֆեդերիկա Մոգերինիի հետ, ով հայտարարեց, որ ԵՄ-ն եւ Ադրբեջանը լավ հարաբերություններ ունեն, մինչդեռ ամեն տարի մեր երկրում մարդիկ են մահանում կտտանքների պատճառով:Ադրբեջանը բռնապետություն է, թեպետ դա չի անհանգստացնում Եվրոպային: Մենք պահանջում էինք պատժամիջոցներ, սակայն ապարդյուն: Այսօր իրավիճակն Ադրբեջանում չափազանց վտանգավոր է. մենք մոտ ենք տնտեսության փլուզմանը: Դրա արդյունքում շատերն են լքում Ադրբեջանը եւ մեկնում Ռուսաստան: Մեզ անհանգստացնում է Իրանի կողմից աջակցություն ստացող մահմեդական խմբավորումների հզորության աճը, հնարավոր է՝ երկրում ճգնաժամ սկսվի՝ սիրիականին շատ նման»,- ասել է Յունուսը: «Պատժամիջոցներ չեն կիրառվում, քանի որ մենք ունենք նավթ եւ գազ, որոնցից կախված է Եվրոպան, որը ձգտում է ավելի անկախանալ ռուսական էներգակիրներից »,- ասել է Յունուսը: