«Հայաստանում սահմանափակ իշխանություն ունեցող նախագահը երդվեց». միջազգային լրատվամիջոցների արձագանքը

Այսօր Արմեն Սարգսյանը պաշտոնապես ստանձնեց Հայաստանի Հանրապետության նախագահի պարտականությունները։ Միջազգային լրատվամիջոցները ևս անդրադարձել են Արմեն Սարգսյանի երդմնակալության արարողությանը։ Associated Press-ը գրում է. «Հայաստանը նոր նախագահ ունի, երկիրն անցում է կատարել մի համակարգի, որտեղ նախագահն ավելի քիչ լիազորություններ ունի։ Արմեն Սարգսյանը, պաշտոնապես անցնելով իր պարտականություններին, խոստացել է աշխատել արդարադատության համակարգի բարելավման համար և պայքարել կոռուպցիայի դեմ: Պառլամենտական պետության անցումից հետո նախագահի պաշտոնը կրում է զուտ արարողակարգային բնույթ։ Այս ամենի արդյունքում էլ,ըստ քննադատների փոփոխությունը թույլ կտա Սերժ Սարգսյանին պահել իր իշխանությունը արդեն նոր՝ վարչապետի պաշտոնում։ Սարգսյանի կուսակցությունը խորհրդարանում մեծամասնություն է կազմում»։ Ամերիկյան մեկ այլ կայք՝ ABC News-ը ևս գրում է ՀՀ-ի՝ կառավարման նոր համակարգի անցնելու մասին, որի հանրաքվեն անցկացվեց 2015-ին: The Penisula Qatar-ը հայտնում է Հայաստանում 63-ամյա նախկին նախագահ Սերժ Սարգսյանի դեմ քաղաքացիների բողոքի ցույցերի մասին: France Press-ը ևս անդրադարձել է Արմեն Սարգսյանի երդմնակալությանն ու ՀՀ նախագահի լիազորությունների ստանձմանը։ «Միացյալ Թագավորությունում ՀՀ նախկին դեսպանը ստանձնել է իր պարտականությունները խորհրդարանի հատուկ նիստի ժամանակ՝ աջ ձեռքը դնելով Նոր կտակարանի 7-րդ դարի ձեռագրի և Հայաստանի Սահմանդրության վրա։ Հետո օրհնություն է ստացել հայ եկեղեցու առաջնորդ Ամենայն հայոց կաթողիկոս Գարեգին Երկրորդից»,- գրում է ֆրանսիական գործակալությունը։ Երդմնակալության արարողությանն ու Արմեն Սարգսյանի խոստումներին անդրադարձել են նաև Radio Free Europe-ը, The Sun-ը, Daily Mail-ը, Daily Star-ը, Financial Express-ը, New York Times-ը, Washington Post-ը: Մասնավորապես, բրիտանական Daily Mail-ը հայտնում է «սահմանափակ իշխանություն ունեցող ՀՀ 4-րդ նախագահի երդմնակալության» մասին: