Ահա թե որտեղ էր թաքնված «շան գլուխը»
Կասպիական նավատորմիղի նավերն ու անձնակազմը Աստրախանից Դաղստանի տարածքում վերատեղակայելու Ռուսաստանի պլանները Ադրբեջանում մտահոգությունների տեղիք են տվել։ Կասպյան նավատորմը, որն ընդգրկված է Ռուսաստանի զինված ուժերի Հարավային ռազմական օկրուգում, որի կազմում է, հիշեցնենք, նաև Հայաստանում տեղակայված ռուսական բազան, այսպիսով ավելի է մոտենում Ադրբեջանին։ Կասպիական նավատորմիղի հիմնական բազան դառնալու է Մախաչկալայից հարավ գտնվող Կասպիյսկ քաղաքը, որը Ադրբեջանի հետ սահմանից ընդամենը 140 կիլոմետր է հեռու: Թեև ռուսական կողմն այս փոփոխությունները բացատրում է եղանակային պայմաններով, այդուհանդերձ, Ադրբեջանում կարծիքներ են հնչում, թե Բաքուն պետք է զգուշանա և պատրաստվի։ «Թուրան» գործակալության հետ զրույցում, մասնավորապես, նման կարծիք է հայտնել Ադրբեջանի զինված ուժերի պահեստազորի փոխգնդապետ Ուզեիր Ջաֆարովը։ «Ռուսաստանը Կասպից ծովի հետ կապված հեռուն գնացող պլաններ է իրագործում՝ ձգտելով դառնալ ամենաուժեղը Կասպիցի վրա և ամրապնդել իր այդ կարգավիճակը։ Կրեմլը խոշոր ֆինանսներ է ներդնելու Կասպյան նավատորմի զարգացման համար», - ասել է Ջաֆարովը՝ համոզմունք հայտնելով, թե Մոսկվայում գիտեն, որ վաղ թե ուշ մերձկասպյան տարածաշրջանում ուժեղ պայքար է սկսվելու առաջնորդության համար։ Ինչ վերաբերում է Ադրբեջանի համար սպառնալիքներին, ապա «Թուրան» գործակալության հետ զրույցում ադրբեջանցի զինվորականը շեշտում է. - «Որտեղ կա ռուսաստանյան զինուժ, այնտեղ եղել է և կլինի լարված իրավիճակ։ Առաջիկայում մեզ սպասում են ոչ միայն ցամաքային սահմանների ամրապնդման հոգսեր, այլ նաև ստիպված ենք լինելու լրջորեն մտածել երկրի ծովային հզորության մասին», հայտնում է «Ազատությունը»։ Պաշտոնաթող գնդապետ, ռազմական փորձագետ Շշեիր Ռամալդանովը, մինչդեռ, ռուսական նավատորմի տեղափոխումը Ադրբեջանի համար սպառնալիք չի համարում։ «Ռուսաստանը մեր ռազմավարական գործընկերն է, մենք հրաշալի հարաբերություններ ունենք Ռուսաստանի հետ։ Ռուսաստանն իր շահերն ունի Կասպից ծովում։ Մեր հարաբերությունները, ընդհանուր առմամբ դրական են», - նշել է ռազմական փորձագետը՝ հիշեցնելով, որ Բաքուն Կովկասում ռուսական զենքի հիմնական գնորդն է, ինչպես նաև Ռուսաստանի էներգետիկ ոլորտի գործընկերը։ «Մեր հարաբերությունները Ռուսաստանի հետ շարունակելու են հետագայում էլ հաջողությամբ զարգանալ», - հայտարարել է Ադրբեջանի զինված ուժերի պաշտոնաթող գնդապետ Շշեիր Ռամալդանովը։ Այն, որ Ռուսաստան-Ադրբեջան հարաբերություններում «սև կատու» է անցել՝ դեռ օրեր առաջ էինք եզրակացրել: Ըստ ամենայնի, Բաքվի դժգոհության արդյունքում էլ Ռուսաստանը բաց թողեց Ադրբեջանի՝ ռուսական զենքից դժգոհ լինելու տեղեկատվությունը՝ ստիպելով Ադրբեջանին արդարանալ, ապա հերքել տեղեկատվությունը: Սակայն, իրականում, փաստացի Բաքվի իրական դժգոհության առիթն այլ է. Կասպիական նավատորմիղի նավերն ու անձնակազմը Աստրախանից Դաղստանի տարածքում վերատեղակայելու Ռուսաստանի պլաններն են, որ Ադրբեջանում մտահոգությունների առիթ են հանդիսացել։ Իսկ սա մի իրավիճակ է, երբ անդունդը Մոսկվայի և Բաքվի միջև կարող է էլ ավելի խորանալ և ունենալ ավելի կոնկրետ հետևանքներ: Թամար Բագրատունի
Հետևեք մեզ Viber-ում
