ԱԱԾ պետի համեստ ունեցվածքը և Գալուստ Սահակյանի որդու միլիոնները

ԱԱԾ պետ Գեորգի Կուտոյանը Բարձրաստիճան պաշտոնյաների էթիկայի հանձնաժողովին է ներկայացրել 2017-ի իր հայտարարագիրը, որտեղ ԱԱԾ պետքը ոչ շարժական, ոչ անշարժ գույք չի հայտարարագրել, ընդամենը ցուցադրել է իր դրամական միջոցները, որոնք ոչ էականորեն, բայց տարբերվում են նախորդ տարիներից: Հիշեցնենք, որ Սերժ Սարգսյանի օգնական եղած ժամանակ Կուտոյանն հայտարարագրում էր ընդամենը 2 միլիոն դրամ, իսկ աշխատավարձի դիմաց մոտ 5 միլիոն դրամ: Գեորգի Կուտոյանը մինչ ԱԱԾ պետ նշանակվելը զբաղեցրել է գլխավոր դատախազի տեղակալի, նախագահի օգնականի պաշտոնները: Կուտոյանը դեռևս 25 տարեկան հասակում արդեն իսկ զբաղեցնում էր Մարդու իրավունքների պաշտպանի գլխավոր խորհրդականի պաշտոնը: Ինչեւէ, Սերժ Սարգսյանի օգնականի պաշտոնում ներկայացրած համաձայնագրի համաձայն՝ Կուտոյանը չուներ ոչ բնակարան եւ ոչ էլ ավտոմեքենա: Գեորգի Կուտոյանի կինը հայտարարագրել է չորս միլիոն դրամի դրամական միջոցներ: Կուտոյանը իր 2016 թ. պաշտոնը ստանձնելու հայտարարագրում նշել էր նաեւ մեկ բնակարան և «MERCEDES–BENZ E320 4 MATIC» մակնիշի ավտոմեքենա ունենալու մասին: 2016-ին նա ընդամենը 1 միլիոն դրամ էր հայտարարագրել: Եւ ահա, 2017-ի հայտարարագրում Կուտոյանը ցուցադրել է հիմնականում դրամական միջոցները, բացառությամբ Ավտոտնակի (տրանսպորտային միջոցների կայանման համար հողամասի վրա կառուցված առանձին շինություն), որը նա ձեռք է բերել անցնող տարում 3 միլիոն դրամով: Կուտոյանը հայտարարգրել է 2 միլիոն դրամ, որը հարկային տարվա վերջում պակասել է ուղիղ կիսով չափ, տարեկան եկամուտը կազմում է 8.4 մլն դրամ՝ աշխատավարձից ստացած գումարն է: Ի դեպ, Կուտոյանի տեղակալ Արզուման Հարությունյանը, որը ԲԴԽ ղեկավար Գագիկ Հարությունյանի եղբայն է եւ խնամիական կապ ոնի Սերժ Սարգսյանի եղբոր հետ, ավելի հարուստ է, քան իր ղեկավարը: Նա հայտարարագրել է 4,5 միլիոն դրամ եւ 37,000 դոլար, աշխատավարձն էլ մոտ 7 միլիոնի չափով է: Հարությունյանի կինն էլ 30 դոլար է հայտարարագրել: Կառավարության առընթեր Պետգույքի վարչության պետ Արման Սահակյանը, որը Գալուստ Սահակյանի որդին է, հայտարարագրել է անավարտ (կիսակառույց) շինություններ, որոնք ձեռք է բերել 19,680,000.00 ՀՀ դրամով, 5 հողամաս, որոնցից մեկը օտարել է 560,000.00 ՀՀ դրամով, իսկ մնացածները ձեռք է բերել հարկային տարում ընդհանուր մոտ 8 միլիոն գումարով: Սահակյանը հայտարարագրել է մոտ 200 մլն դրամ, որը հարկային տարվա ավարտին աճել է դառնալով 434 միլիոն, Սահակյանի տարեկան եկամուտը կազմում է 187 միլիոն դրամ, որից միայն 7 միլոն դրամն է աշխատավարձից գոյանում, իսկ մնացածը շահաբաժին, վարձակալության դիմաց ստացած վճար, գույքը վաճառելու գումար եւ փոխառություններից ստացած միջոցներ: Պակաս հարուստ չէ նաեւ նրա հանրահայտ տիկինը: Սեդա Հակոբյանը Աջափնյակում գտնվող մանկապարտեզներից մեկի տնօրենն է, 2017 թվականի ապրիլյան ընտրություններից առաջ ամուսնու համար ընտրողների ձայների հավաքագրմամբ էր զբաղված: Նա հայտարարագրել է 25 մլն դրամ, տարեկան 937 հազար դրամ եկամուտ՝ աշխատավարձից ստացած գումար: Անի Սահակյան