Ինչ գույք ու փող ունեն կին պատգամավորները

Ազգային ժողովի կին պատգամավորներն ի տարբերություն տղամարդ գործընկերների աչքի չեն ընկնում իրենց ունեցվածքով: Բարձրաստիճան պաշտոնյաների էթիկայի հանձնաժողովում նրանց հայտարարագրերի ուսումնասիրություններից պարզ է դառնում, որ այդ կանանց ամուսիններն էլ առանձնապես մեծ ունեցվածքի տեր չեն եւ շատերի պարագայում կանայք անհամեմատ հարուստ են սեփական ամուսիններից: Հարկ է նշել, որ Հերմինե Նաղդալյանը դեռեւս չի ներկայացրել իր հայտարարագիրը, հետեւաբար այս պահի դրությամբ բոլոր պատգամավոր կանայք, որոնք ներկայացրել են, ապրում են աշխատավարձի հույսին: Հիշեցնենք, որ, Նաղդալյանը իր անծայրածիր ունեցվածքով չի զիջում ՀՀԿ-ի օլիգարխներին, նա ամեն տարի մի քանի տուն, մի քանի ավտոմեքենա եւ դրամական մեծ կարողություններ է հայտարարագրում: Այսպիսով՝ Հովիկ Աբրահամյանի զարմուհու՝ Կարինե Պողոսյանի ունեցվածքը տարեցտարի նվազում է: Պատգամավորը անշարժ եւ շարժական գույքեր չի հայտարարագրել, բաժնետոմսեր, թանկարժեք իրեր չունի, նա ապրում է աշխատավարձով, տարեկան եկամուտն էլ կազմում է 6,860,960.00 դրամ: Տիկնոջից վատ վիճակում է նաեւ ամուսինը: Նրա տարեկան եկամուտն ընդամենը 780 հազար դրամ է: Սակայն ինչպես երերում է ընտանիքը քչով յոլա գնացող է, դեռ մի բան էլ՝ լավ ապրող: Պողոսյանի ամուսինը նոր մեքենա է կարողացել գնել 2017-ի ընթացքում՝ KIA SORENTO 3.8 ավտոմեքենա՝ 650 հազար դրամով,իհարկե , նա 400 հազար դրամով վաճառել է VOLKSWAGEN TOUAREG –ը: Հիշեցնենք, որ նախկին ՀՀԿ-ական պատգամավոր Կարինե Պողոսյանը այս տարի վերստին ԱԺ պատգամավոր է դարձել «Ծառուկյան դաշինքով»: 2016-ին տիկին Պողոսյանը հայտարարագրել էր 7 միլիոն 164 հազար դրամ՝ որպես եկամուտ: 2015-ին՝ 7 մլն․ 386 հազար 730 դրամ: Փաստորեն,տարեցտարի պատգամավորի եկամուտը նվազում է: Հավանաբար այդ պատճառով է, որ Պողոսյանը Երեւանում վարձակալած իր բնակարանի համար փոխհատուցում է ստանում պետբյուջեից՝ հայտարարելով, որ պատգամավորի բնակպայմանները պետք է հարմարավետ լինեն: Պետբյուջեից, ինչպես հայտնի է, ամսական 100 հազար դրամ է հատկացվում Պողոսյանի եւ մի քանի այլ պատգամավորների բնակվարձի համար: Որեւէ անշարժ գույք, փոխառություն, արժեթուղթ չի հայտարարագրել նաեւ ՀՀԿ-ական Մարգարիտ Եսականը, նրա եկամուտը 8,2 միլիոն դրամ է, 1 միլիոնը ստացված փոխառություններ, մնացածը աշխատավարձ, Եսայանի ամուսնու եկամուտն էլ 7,8 միլիոն է: ԲՀԿ-ական Նաիրա Զոհրաբյանը եկամուտից բացի, որը տարեկան 12 միլիոն է կազմում, հայտարարագրել է նաեւ փոխառություններ՝ 54 եւ 14 հազարական դոլարի չափով: ՀՀԿ-ական Կարինե Աճեմյանն էլ շարժական եւ անշարժ գույք չի հայտարարագրել, տարեկան եկամուտը 7,105,830.00 դրամ է, ամուսնու՝ դերասան Արա Դեղտրիկյանինը՝ 1 միլիոն 164 հազար դրամ: Ծառուկյան դաշինքից Լուիզա Սարգսյանն էլ է միայն աշխատավարձի հույսին,նա էլ բացառապես տարեկան եկամուտն է հայտարարագրել՝ 4 միլիոն դրամ: Անի Սահակյան