Նոր պատերազմ է հրահրո՞ւմ Մոսկվան

Նախօրերին ռուսաստանյան Lenta.ru-ն, վկայակոչելով հայկական մամուլը, «Ռուսաստանը պատրաստվում է Հայաստանին նոր անտոկոս վարկ տրամադրել՝ զենք գնելու համար» վերնագրով ծավալուն հոդված է հրապարակել: Հայաստանի պաշտպանության նախարարի մամուլի քարտուղար Արծրուն Հովհաննիսյանը նոր վարկի մասին տեղեկությունը ոչ հերքել, ոչ էլ հաստատել է: «Մենք մեր սպառազինությունների ձեռքբերման, արտադրության, ռազմարդյունաբերության զարգացման առումով մեր բոլոր գործընկերների հետ ինտենսիվ աշխատում ենք, և առաջնահերթ, բնականաբար, Ռուսաստանի Դաշնության հետ ենք աշխատում: Եվ էս պահին էդ տիպի աշխատանքները շատ բազմապրոֆիլ են: Մենք ոչինչ չենք բացառում՝ այդ թվում նաև միջպետական վարկերի տեսքով, որի փորձը մենք արդեն ունենք՝ ի դեմս 200 և առանձին 100 միլիոն դոլարների», - «Ազատության» հետ զրույցում ասել է նա: «Այսինքն, կարող ենք փաստել, որ այն, ինչ գրել է հայկական մամուլը, այն, ինչ գրել է ռուսական մամուլը, ճշմարտությանը մոտ է», - այս դիտարկմանը Հայաստանի պաշտպանության նախարարի խոսնակն արձագանքել է․ - «Դա չի բացառում մեր էսօրվա աշխատանքի և ոչ վաղ անցյալի փորձի ընդհանուր քայլերը»: Lenta.ru-ն, հղում անելով նորից հայկական մամուլին, գրել է նաև, թե Ռուսաստանը, նոր զենք տրամադրելով Հայաստանին, պատասխանում է Ադրբեջանին: Բաքուն վերջին շրջանում ռուսական զենքին, ըստ հայկական մամուլի, գերադասում է թուրքական, պակիստանյան, իսրայելական և բելառուսական զենքը, գրում է Lenta.ru-ն: Բացի այդ, պարբերականը հավելում է նաև, որ Ռուսաստանը 2016թ. ապրիլյան պատերազմից հետո որոշել է հավասարակշռության բերել ուժերը և մտադիր է իր դաշնակից Հայաստանին այնքան զենք տրամադրել, մինչև ուժերը հավասարվեն: Regnum լրատվական գործակալության գլխավոր խմբագիր Մոդեստ Կոլերովի խոսքով՝ այս նոր հնարավոր վարկը Հայաստանի ոչ առաջինը և ոչ էլ վերջինն է: Հենց այնպես Ռուսաստանը Հայաստանին չի կարող զենք նվիրել, ինչ-որ ձևով այդ վարկը պետք է ձևակերպել, «Ազատության» հետ զրույցում ասաց ռուսաստանցի փորձագետը: Նա ծիծաղելի է որակել հոդվածում տեղ գտած տեղեկությունն այն մասին, թե Ռուսաստանը նեղացել է Ադրբեջանից: Զենքի վաճառքը Ռուսաստանի համար սոսկ բիզնես է՝ առանց որևէ քաղաքականության, եթե Ադրբեջանը ցանկանա նորից զենք գնել Ռուսաստանից, հենց վաղն էլ կգնի, շեշտեց նա: Կոլերովի խոսքով՝ Ռուսաստանը շարունակում է Ադրբեջանին զենք մատակարարել նախկին համաձայնագրի շրջանակում: Ռուսաստանցի փորձագետը ասում է նաև, որ ապրիլյան պատերազմից հետո իրավիճակը հայկական բանակում զգալիորեն փոխվել է: Հայկական կողմը հաստատ դասեր է քաղել պատերազմից և նոր զենք է ձեռք բերել Ռուսաստանից: Հայկական բանակի նոր զենքը, սակայն, չի կանգնեցնի ադրբեջանական կողմի ռազմական նոր գործողությունները: Կոլերովը դրանք անխուսափելի է համարում, քանի որ 2016-ի ապրիլյան պատերազմից հետո նոր պատերազմ չսկսելու որևէ պատասխանատվություն Ադրբեջանը այդպես էլ չի ստանձնել, ընդհակառակը՝ նորանոր սպառնալիքներ է հնչեցնում Հայաստանի հասցեին: Չի բացառվում, որ Ադրբեջանը նոր ռազմական գործողություններ սկսի արդեն այս տարի, հավելում է Կոլերովը: «Ես գրեթե համոզված եմ, որ նոր պատերազմն անխուսափելի է, իսկ Ռուսաստանը, ինչպես և 2016-ի ապրիլին, կփորձի կանգնեցնել Ադրբեջանին», - ասաց ռուս փորձագետը: Այսպես, ռուս-ադրբեջանական ինտրիգը շարունակվում է հասունանալ: Ադրբեջանի «նեղացվածության» մասին, ինչպես նաև Ռուսաստանի՝ «ապրիլյան պատերազմից հետո Ադրբեջանին զենքի վաճառքի քաղաքականության վերանայման» մասին ռուսական կողմից հնչող հավաստիացումները ռուս-ադրբեջանական ինչ-որ գործընթացների մասին են վկայում: Հայաստանին զենք գնելու համար նոր անտոկոս վարկ տրամադրելը Ռուսաստանի կողմից տեղավորվում է՝ Հայաստանին հակառակորդին «թասիբի» գցելու քաղաքականության հետ: Մի կողմից Մոսկվան սաստում է Բաքվին, թե՝ «ինչու՞ ես այլ երկրներից զենք գնում», մյուս կողմից դեպի իրեն է «ձգում» Բաքվին: Իհարկե, այս ամենի մեջ՝ որպես միջնորդ նաև ստանձնելով կողմերին զինելու քաղաքականությանը՝ Մոսկվան շարունակում է պահել իր ազդեցությունը թե՛ հայկական կողմի, թե՛ ադրբեջանական կողմի վրա: Հայաստանի և Ադրբեջանի միջև սպառազինությունն է հավասարակշռո՞ւմ, թե՞ նոր պատերազմ է հրահրում Մոսկվան: Իհարկե, հայկական կողմի համար ձեռնտու է արդիականացնել, համալրել բանակը զինատեսակներով՝ ունենալով Ադրբեջանի նման անկանխատեսելի հակառակորդ: Բայց կարևոր է հարցը, թե հայկական կողմին զինելու քաղաքականության տակ ինչ է թաքնված Մոսկվա-Բաքու հարաբերություններում: Թամար Բագրատունի