Սերժ Սարգսյանը ճարպիկ քաղաքական գործիչ է. Թոմաս դե Վաալ

Հայաստանը թևակոխում է անցումային շրջան, որը նաև ինչ-որ առումով փորձարկում է, carnegieeurope.eu-ում գրում է Քարնեգի հիմնադրամի ավագ գիտաշխատող Թոմաս դե Վաալը՝ իր կանխատեսումն անելով այն մասին, թե ինչ փոփոխություններ են սպասվում Հայաստանին 2018 թվականի ապրիլի 9-ին սահմանադրական բարեփոխումների կյանքի կոչվելուց հետո: Նրա խոսքով՝ Սերժ Սարգսյանը դիվերսիֆիկացրել է Հայաստանի տնտեսությունն ու արտաքին քաղաքականությունը, և մնում է տեսնել, թե արդյոք նա կշարունակի այդ միտումը: Օբյեկտիվ նայելով՝ նոր փոփոխությունները կարող են ավելի լավ լինել Հայաստանի համար, քան նախկին վիճակը, գրում է դե Վաալը և նշում, որ անցած ամիս Հայաստան այցի ընթացքում նա նկատել է, որ տրամադրությունը շատ ավելի դրական է, քան ինքն ակնկալում էր: Չորս տարի առաջ Հայաստանն ակնհայտորեն վատ վիճակում էր, տնտեսությունը փորձում էր վերականգնվել 2009 թվականի միջազգային տնտեսական ճգնաժամի հետևանքով կրած մեծ կորուստներից: Փորձագետը նշում է, որ Սերժ Սարգսյանը ճարպիկ քաղաքական գործիչ է, ով հեռուն է նայում: Այդ ժամանակից ի վեր նա մեծ աշխատանք է կատարել ավելի հավասարակշռված արտաքին քաղաքականության հասնելու համար, գրում է Դե Վաալը՝ նշելով, որ չնայած Ռուսաստանը մնում է գլխավոր գործընկեր, սակայն Հայաստանը փրկել է Բրյուսելի հետ իր համաձայնագրի քաղաքական կետերի մեծ մասը և նոր համաձայնագիր ստորագրել ԵՄ-ի հետ: Բացի այդ, Հայաստանը նաև փորձում է համագործակցել Ասիայի հետ և ներդրում է ձեռք բերել Ասիական զարգացման բանկից՝ «Հյուսիս-Հարավ» ճանապարհի կառուցման համար: Թոմաս դե Վաալը նշում է նաև, որ իշխանությունները ճանապարհ են գտել ավելի լավ աշխատելու սփյուռքի առաջատար գործիչների հետ՝ ինչպիսին է Ռուբեն Վարդանյանը, իսկ բարձրաստիճան պաշտոնյաներն ավելի լավ տպավորություն են թողնում, քան տարիներ առաջ այդ պաշտոնները զբաղեցնող անձինք: Այլ խոսքով՝ Սերժ Սարգսյանը հետևողականորեն հավաքել է գլուխկոտրուկի մասնիկները, որոնք կարող են Հայաստանն առաջ տանել: Գլխավոր հարցը մնում է այն, թե արդյոք դա տեղի կունենա, գրում է Քարնեգի հիմնադրամի ավագ գիտաշխատողը։ Պատրաստեց tert.am-ը