Էդմոն Մարուքյանն անցնում է ՀՅԴ-ի և ՕԵԿ-ի տրորած ճանապարհով. Նիկոլ Փաշինյան

ԱԺ «Ելք» խմաբկցության ղեկավար, «Քաղաքացիական պայմանագիր» կուսակցության անդամ Նիկոլ Փաշինյանը հիշեցրեց, որ «Ելք» դաշինքի համատեղ քաղաքական գործունեության հուշագրի մեջ գրված է, որ ՀՀ-ում խնդիրների լուծումն ունի հրատապություն, ըստ որի յուրաքանչյուրը պետք է օգտագործի ամեն առիթ, իսկ «Ելք» դաշինքը որոշել է, որ Սերժ Սարգսյանի երրորդ ժամկետն անընդունելի է դաշինքի համար:«Ամենակարևոր գործոնը, որ կարող է սպառնալ մեր շատ հարգելի շատ գործընկերներին, կոնֆորմիզմն է՝ հարմարվողականությունն է: 2017 թվականի հունիսին ես «Ելք» դաշինքի անունից լիազորված ասել եմ, որ, եթե ՀՀԿ-ականները փորձեն Սերժ Սարգսյանին կարգեն ՀՀ ղեկավար, ուրեմն՝ ժողովուրդը պետք է իմանա, որ ունի հնարավորություն դուրս գալ փողոց և փոխել իրավիճակը: Հիմա մեր գործընկերներն ասում են, որ ժողովուրդը չի կարող դուրս գալ փողոց և փոխել իրավիճակը: Նրանք 2017 թվականի հունիսին կողմ են արտահայտվել, որ մեր դիրքորոշումն այն է, որ ժողովուրդը կարող է դուրս գալ փողոց և փոխել իրավիճակը: Ես հիմա գործում եմ «Ելք» դաշինքի կայացրած որոշումների տրամաբանության մեջ»,- հայտարարեց Փաշինյանը: Խոսելով «Լուսավոր Հայաստան» կուսակցության ղեկավար Էդմոն Մարուքյանի հոդվածից՝ ասաց, որ Էդմոն Մարուքյանն անցնում է ՀՅԴ-ի և ՕԵԿ-ի տրորած ճանապարհով. «Էդմոն Մարուքյանի հոդվածում խոսվում էր տրորված ճանապարհների մասին: Ես կարծում եմ, որ, եթե այդ տրամաբանությամբ գնանք, այն ճանապարհը, որը գծագրված էր պարոն Մարուքյանի այսօրվա հոդվածում, այն նույնպես տրորված է մի քանի անգամ և տրորվել է ՀՅԴ-ի և ՕԵԿ-ի կողմից»: