Վիգեն Սարգսյանը Արմենակ Ուրֆանյանի մոր դժգոհությունների մասին
«Եռաբլուր» զինվորական պանթեոնում այսօր լրագրողները հետաքրքրվեցին, թե պաշտպանության նախարար Վիգեն Սարգսյանը արդյոք տեղյակ է՞ ապրիլյան պատերազմին զոհված սպա Արմենակ Ուրֆանյանի մոր դժգոհություններից, որ իր որդուն ազգային հերոսի կոչում չեն տվել։ Ի պատասխան նախարարն ասաց. «Արմենակ Ուրֆանյանի մայրը հայ մոր փայլուն օրինակ է, մոր, որը սպա է ծնել, դաստիարակել, մոր, որը ցանկացած սպայից ոչ պակաս հասկանում է, թե հայրենիքի պաշտպանությունն ինչ է նշանակում։ Ես հանդիպել եմ Արմենակ Ուրֆանյանի մոր հետ, մեծ հարգանք և մեծ ակնածանք ունեմ իր անձի նկատմամբ։ Իր այդ դժգոհությունը նա նախկինում ևս հայտնել է, երբ ես դեռ նախարար չէի։ Ես նրան բացատրել եմ, որ այդ գործընթացը մեկ անձի կամ փոփոխված նախարարի մակարդակի լուծելու խնդիր չէ»։ Նախարարի համոզմամբ՝ յուրաքանչյուր նման դեպք մանրամասն ուսումնասիրվում է, և համադրելով բազմաթիվ հանգամանքներ՝ հատուկ հանձնաժողովներ ներկայացնում են միջնորդություն պաշտպանության նախարարին, նախարարը՝ հանրապետության նախագահին, և կայացվում են այն որոշումները, որոնք կայացվել են։
Հետևեք մեզ Viber-ում
