Հայաստանը պետք է դիմեր ՄԱԿ-ի անվտանգության խորհուրդ, այնինչ՝ դա չի արել. Լարիսա Ալավերդյան

2016 թվականի ապրիլին տապալվեցին Ադրբեջանի ցանկությունները,Հայելի ակումբում լրագրողների հետ հանդիպմանն ասաց  «Ընդդեմ իրավական կամայականությունների» ՀԿ գործադիր տնօրեն Լարիսա Ալավերդյանը: Ըստ նրա՝ ներկայումս Արցախի հարցի վերաբերյալ խոսելիս կարևոր է ընգծել նախագահ Բակո Սահականի այցը Վաշինգտոն, այդ հրավերն ազդակ էր, որը լսելի է եղել նաև Ռուսաստանի կողմից: «Բացվել է նոր մի հնարավորությունների դաշտ, և այդ հնարավորություններից պետք  է օգտվել այնքանով, որքանով կարողանում ես, մի քիչ ավել նույնիսկ, ոչ մադրիդյան սկզբունքներն են փոխվել, ոչ էլ հիմնախնդիրը»,-նկատեց նա: Ինչպիսին կարող է լինել երկու երկներում էլ ընտրությունների ազդեցությունը հարցի վրա,հարց ուղղեցին լրագրողները , Լ. Ալավերդյանը պատասխանեց. «Այդ իշխանափոխությունն առանց դեմքերի փոփոխության է տեղի ունենում, նախանշաններն այդպիսին են, և այդ առումով Ալիևը օր առաջ կանխեց հնարավոր զարգացումները, որոնք կարող էին սպառնալ իր իշխանության գալուն, որ  քաղաքական հարցերով ձերբակալումները կուժեղանային, կշատանային: Հայաստանում ունենալու ենք  սահմանադրական առումով առնվազն նոր համակարգ, բայց 10 անգամ կարող եմ կրկնել, որ ունենալու ենք այն, ինչին կարողանալու է հասնել քաղաքացիական հասարակությունը, առնվազն իշխանություններին թույլ չտալ դուրս գալ այն գրավոր պայմանագրերից, որ կան»: Լարիսա Ալավերդյանը համոզված է՝ ճիշտ քայլ էր, որ ապրիլյան պատերազմում ադրբեջանցիների կողմից հայ զինվորների մարմինների խոշտանգման վերաբերյալ բոլոր գործերը ուղարկել են Մարդու իրավունքների եվրոպական դատարան։ «Բայց նաև կարծում եմ, որ Հայաստանը պետք է դիմեր ՄԱԿ-ի անվտանգության խորհուրդ, այնինչ Հայաստանը դա չի արել», - ասաց «Ընդդեմ իրավական կամայականության» ՀԿ նախագահը։