Եթե Նիկոլ Փաշինյանը չի ընդունում Սերժ Սարգսյանին, ուրեմն պետք է նախ ԱԺ-ն ցրելու պահանջ քաշի

Հարցազրույց Գերագույն խորհրդի պատգամավոր Ազատ Արշակյանի հետ: -Հայաստանում ԱՄՆ դեսպան Ռիչարդ Միլսը հայտարարել է, որ իրենք չեն  հանդուրժում և չեն սատարում «Սասնա Ծռերի» և առհասարակ որեւէ զինված խմբավորման  գործողությունները, որոնք նման կերպ են ցանկանում տապալել իշխանություններին: Ինչպես կբացատրեք դեսպանի հայտարարությունը: Այս փուլում, երբ Սերժ Սարգսյանը պատրաստվում է վարչապետ դառնալ, արդյոք սա անուղղակի աջակցություն չէ նրա իշխանությանը: -Ավելի ճիշտ կլինի ասել, որ իրենք իրենց են աջակցում, եթե մենք նրանց  մեղադրում ենք, որ աջակցում եք իշխանափոխության մեջ, ապա նրանք էլ իրավունք ունեն ինքնապաշտպանվելու, ասելու, որ չեն աջակցում զինված հեղաշրջումներին: Չէ՞ որ մենք նման հայտարարություններով ԱՄՆ-ի հեղինակության վրա ենք ազդում, եւ հիմա դեսպանն ուզում է, որ բոլորն իմանան: Ի վերջո, ԱՄՆ-ի վարքագիծը վերջերս  համայն աշխարհի ուշադրության կենտրոնում է եւ այս հայտարարությունն էլ պետք է դիտարկվի ռուս-ամերիկյան հարաբերությունների համատեքստում:  Ռուսները հիմա ամեիկացիներին մեղադրում են, որ ուրիշների ներքին գործերին են մեղադրում, Սիրիայում օրինակ օգնում են քաղաքացիական պատերազմ հրահորղներին, հայտարարության ենթատեքստից բխում է, որ Հայաստանում էլ են դա անում, եւ ահա դեսպանն ասում է, որ դա չենք անում: -Պարոն Արշակյան անցնելով մեր ներքաղաքական հարցերին, գիտեք, հավանաբար, որ այս օրերին ընդդիմադիր դաշտում կոնսուլտացիաներ են ընթանում, փորձում են միավորվել ընդդեմ Սերժ Սարգսյանի վարչապետությունը կանխելու դեմ: Կարծում եք ընդդիմությանը կհաջողվի միասնական ճակատ կազմել եւ ինչից է կախված հաղթանակի գրավականը: -Խնդիրն անհեթեթ է, Սերժ Սարգսյանին առաջադրելու է Հանրապետական խմբակցությունը, որն ԱԺ-ում մեծամասնություն է եւ ում որ այդ մեծամասնությունը նպատակահարմար գտավ, նրան էլ կառաջադրի վարչապետի պաշտոնում: Հետեւաբար հարկավոր է ոչ թե Սերժ Սարգսյանին դեմ լինել, այլ ՀՀԿ-ին, իսկ սա նշանակում է չճանաչել ԱԺ-ի լեգիտիմությունը  : ԵԼՔ դաշինքում երկու ուժեր մերժել են փողոցային պայքարը եւ միայն Քաղաքացիական պայմանագիրն է Նիկոլ Փաշինյանի գլխավորությամբ փողոց դուրս գալուն պատրաստվում: Այսինքն առաջին երկուսն ավելի ճիշտ են, քան Փաշինյանը: -Գիտեք ՔՊ-ն ունի անդամներ եւ իրենք են որոշում իրենց քաղաքական կուրսը, բայց երբ որ հիմա ասում են, թե համաձայն չենք ձեր թեկնածուի հետ, նախ պետք է ասի ՀՀԿ-ին, որ համաձայն չենք, որ դուք ԱԺ-ում եք:Ես համաձայն չեմ ու չեմ ճանաչում ԱԺ լեգիտիմությունը: Երբ մարդիկ ասում են, որ դեմ են Սարգսյանին, նշանակում է՝ ասում են չենք ճանաչում  ՀՀԿ մեծամասնություն, ԱԺ լեգիտիմությունը, պետք է նախ ԱԺ-ն ցրելու պահանջ դրվի: Իրենք ասում են՝ եթե Սերժ Սսարգսյանը ժամանակին չխաբեր, որ չի առաջադրելու, գուցե գործընթացներն այլ կերպ զարգանար, չընդունվեր այս Սահմանադրությունը եւ նա էլ հնարավորություն չունենար վարչապետ դառնալու: Դա սենտիմենտ է, քաղաքականության հետ կապ չունի, եթե դեմ են Սերժ Սարգսյանին, դեմ են նաեւ ՀՀԿ-ին: Իսկ Հանուն Հայաստան պետության ճակատը , որը չի անցել խորհրդարան, իրավունք չունի՞ պայքարելու: -Գիտեք, նրանք էլ այնքան մեծ զանգված պետք է ունենան, որ կարողանան իրենց այլընտրանքային թեկնածուին պարտադրել խորհրդարանական մեծամասնությանը: Սեյրան Օհանյանը կմիանա՞ այդ ճակատին: -Ես տեղեկություն չունեմ, չեմ շփվում իր հետ, եթե միանա , կհայտարարի այդ մասին: Անի Սահակյան