Սամվել Ալեքսանյանի «կալվածատիրական» նկրտումներն ու Սերժ Սարգսյանից Անգելա Մերկել «կերտումը»

Երեւանի փոխքաղաքապետ, Մալաթիա-Սեբաստիա համայնքի նախկին ղեկավար Դավիթ Օհանյանը այսօր Եռաբլուրում հայտարարել է, թե պատրաստ է տեղը զիջել ՀՀԿ խմբակցության պատգամավոր Սամվել Ալեքսանյանի եղբորորդուն՝ Արտակ Ալեքսանյանին: Վերջինը Մալաթիա-Սեբաստիա համայնքի ղեկավարն է եւ, ինչպես ժամանակին Դավիթ Օհանյանը, ով Սամվել Ալեքսանյանի կամակատարներից մեկն է։ Գործող թաղապետ՝ Լֆիկի եղբորորդուն տեղեկությունների համաձայն հոպարը ցանկանում է տեսնել Տարոն Մարգարյանի տեղում՝ քաղաքապետի պաշտոնին եւ այդ նպատակը որոշել է իրագործել փուլային տարբերակով՝ նախ փոխքաղաքապետ, ապա քաղաքապետ։ «Դա որոշում են կուսակցությունը եւ Երեւանի քաղաքապետը: Իհարկե՝ ես շատ կուզենայի, որ երիտասարդ կադրերն առաջ գնան»,- մասնավորապես ասել է Դավիթ Օհանյանը, իհարկե, այլ բան չէր էլ կարող ասել, քանզի նա հենց այնպես չի հայտնվել այդ պաշտոնում եւ պարտավոր է ենթարկվել «շեֆի» նոր ցանկություններին, ասել կուզի՝ Սամվել Ալեքսանյանը պոլի փետի թեկնածություն էլ առաջադրեր, Օհանյանը մեծագույն սիրով էր գովերգելու այդ թեկնածուին եւ իր տեղը զիջելու պատրաստակամություն հայտնելու։ Մինչդեռ մամուլը բազմիցս անդրադարձել է Ալեքսանյանների տոհմի «հրաշամանուկի» շեդեւր մտքերին, մասնավորապես բակային հայնդիպումներից մեկի ժամանակ նա այգում տեղադրված կոմպոզիցիաները անվանել էր «սիմպոզիումներ», գարնան առաջին օրն էլ խմբագրել հայ բանաստեղծներից մեկին սոցցանցի իր էջում գրելով․«Թող գարունները գան ու մնան․․․»։ Եռաբլուրում Աշոտ Նավասարդյանի հիշատակին նվիրված միջոցառմանը ներկա է եղել նաեւ հրաշամանուկը, նա, սակայն, ամոթխած աչքերը ճպճպացրել է ու ասել, թե նոր է լսում իր փոխթաղապետ, ապա քաղաքապետ դառնալու մասին։ Մինչ Ալեքսանյանները որոշել են ընդյալնել իրենց կալվածքները՝ Մալաթիայից բացի տնօրինելով ողջ Երեւանը, կարկառուն ՀՀԿ-ական Գալուստ Սահակյանի որդին՝ Պետական գույքի կառավարման վարչության պետ ՀՀԿ-ական Արման Սահակյանը խանդավառված է Սերժ Սարգսյանի մեր սահմանների անառիկությամբ ու հենց թեկուզ միայն այդ պատճառով նա ասում է, թե պարտավոր ենք Սերժ Սարգսյանին նորից խնդրել դառնալ վարչապետ․ «Մենք բազմիցս ասել ենք, եւս մեկ անգամ կրկնում եմ. հաշվի առնելով մեր երկրի ներքին ու արտաքին մարտահրավերները՝ այս պահին Հանրապետական կուսակցության բոլոր անդամները նպատակահարմար են գտնում առաջադրել Սերժ Սարգսյանի թեկնածությունը»: Պնդումներին, թե Սարգսյանը բոլոր ոլորտներում ձախողել է, Սահակյանն ասել է՝ մարդիկ պարզապես լավը չեն տեսնում․«Մեր խնդիրն այն է, որ մենք երբեւիցե լավը չենք տեսնում, դուք երբեւէ չե՞ք տեսել այդ ձեռքբերումները, օրինակ՝ մեր անառիկ սահմանները»: Հիշեցմանը, որ ապրիլյան պատերազմը հակառակի մասին վկայեց, Արման Սահակյանը պատասխանել է. «Դուք չեք ուզում տեսնել կատարված աշխատանքի լավը»: Դե իսկ սփյուռքի հավերժ նախարար Հրանուշ Հակոբյանը Սերժ Սարգսյանին արդարացնում է բոլոր դրվագներով։ Նորմալ է, որ երկու տարի առաջ Սերժ Սարգսյանը հայտարարում էր՝ 3-րդ անգամ չի հավակնելու երկրի ղեկավարի պաշտոնին , նորմալ է, որ հիմա հակառակն է անում։ Հակոբյանը Սարգսյանին համեմատում է Գերմանիայի կանցլեր Անգելա Մերկելի հետ: «Կյանքը դոգմա չի, որ մի բան ասեցիր՝ անպայման դա լինի: Կյանքը զարգանում է, փոփոխվում է, դիալեկտիկայի օրենքները բոլորիս հայտնի են: Նախագահը խոստում չէր տվել, դա ընդհանրապես ասված էր տվյալ պահին: Յուրաքանչյուր պահ ունի իր տրամաբանությունը․․․Նայեք՝ Անգելա Մերկելը քանի անգամ է ընտրվում՝ 4-րդ անգամ»,- հավելել է նախարարը: Բնական է, որ բոլորի դարդուցավը ոչ այնքան երկիրն ու պետության շահն են, ինչպես նաեւ Սերժ Սարգսյանի հատկանիշների արժեւորումը, այլ միայն ստատուս քվոյի պահպանումից եւ Սերժ Սարգսյանի իշխանության շարունակությունից է կախված լինելու նրանց ապագան, թեպետ հանուն արդարության տիկին Հրանուշը բացառություն է, նա նույնքան անառիկ ու անփոխարինելի է, որքան Սերժ Սարգսյանը։ Նա համակարգում է վաղնջական ժամանակներից, ինչպես ասում են՝ նա Իշտոյան է տեսել, Բրեժնեւ ու Սերժ Սարգսյան Անի Սահակյան