Ո՞ւմ են պատժելու ռուս ոստիկանները Հայաստանում
Գյումրիի ռուսական 102-րդ ռազմակայանում և Երևանի զինվորական կայազորում կտեղակայվեն ռուսական ռազմական ոստիկանության ստորաբաժանումներ, նախօրեին տեղեկացրել «ՌԻԱ Նովոստի»-ն՝ հղում կատարելով ռուսական Հարավային զինվորական օկրուգի լրատվական ծառայությանը։ Մինչ ռուսական պաշտոնական աղբյուրը ռազմական ոստիկաններ տեղակայելուն անդրադառնում է ինչպես կայացած փաստի, Հայաստանի պաշտպանության նախարարությունը տեղեկացնում է, որ ռազմական ոստիկաններ տեղակայելու շուրջ դեռ փաստաթուղթ չկա: «Այդ խնդիրը այս պահին քննարկման մեջ է, և կիրականացվի միայն համապատասխան միջպետական համաձայնագրով իրավական կարգավորմամբ: Կարող է նոր համաձայնագիր լինի, պայմանագիր լինի, լրացում լինի գործողին՝ չեմ կարող ասել: Բայց համապատասխան իրավական կարգավորում տալուց հետո», «Ազատությանն» ասել է Պաշտպանության նախարարության մամուլի խոսնակ Արծրուն Հովհաննիսյանը: Նրա խոսքով՝ ռազմական ոստիկանության ստորաբաժանումներ տեղակայելու վերաբերյալ հիմա քննարկումներ են ընթանում, իսկ ռուսական ռազմական ոստիկաններ Հայաստանում տեղակայելը պայմանավորում են Գյումրիի 102-րդ ռազմակայանում եղած կարգապահական խնդիրներով։ Ռազմական ոստիկանների գործառույթը, ըստ ռուսական պաշտոնական աղբյուրի, կլինի ռուսական ռազմակայանում կարգուկանոն պահպանելը, ռազմաբազայի օբյեկտների պահպանությունն ու ճանապարհային երթևեկության անվտանգությանը հետևելը։ Նոր ստորաբաժանումը, ըստ ամենայնի, ներդրվում է ռուսական զինված ուժերում բարեփոխումների շրջանակում, ընդհանուր առմամբ կարգուկանոն սահմանելու նպատակով, և այն չի կարելի արտակարգ իրադարձություն համարել։ Առայժմ պարզ չէ, թե Ռուսաստանից ռազմական ոստիկանները երբ կժամանեն Գյումրի, սակայն Երևանում նման ստորաբաժանում կստեղծվի արդեն ամռան սկզբին։ Որ Գյումրիի ռուսական 102-րդ ռազմակայանը չէր փայլում իր կարգապահությամբ՝ դրանում տարիներ շարունակ մենք համոզվել ենք աղմկահարույց միջադեպերի շարքով: Մի քանի արտառոց դեպքերի և Ավետիսյանների ընտանիքի սպանությունը Գյումրիում ասվածի վառ ապացույցն է: Ռուսական պատկան մարմիններն էլ, վստահաբար, գիտակցեցին, որ ամենաթողությանը պետք է վերջ տալ: Սակայն հարցն այն է, որ Հայաստանում նման ստորաբաժանման ստեղծումը ինչ-որ պահից կարող է «ընդլայնել» իր գործունեության ոլորտը և չսահմանափակվել զուտ Գյումրիի ռուսական 102-րդ ռազմակայանում և Երևանի զինվորական կայազորում գործունեությամբ: Այստեղ է, որ կարող են առաջանալ հարցեր: Մասնավորապես՝ կարո՞ղ են ռուս ոստիկանները Գյումրիի ռուսական 102-րդ ռազմակայանից և Երևանի զինվորական կայազորից դուրս գործունեություն ծավալել... Սրանք հարցեր են, որոնց պատասխանները պետք է հստակ սահմանված լինել, որպեսզի հասարակության շրջանում չառաջանա ավելորդ անհանգստություն, կամ կասկածներ: Թամար Բագրատունի
Հետևեք մեզ Viber-ում
