Խնդիրներ Պուտինի ու Ալիևի միջև. ռուսական հրթիռներն էլ չեն պայթում

Երեկվանից ռուսաստանյան մամուլում հետաքրքրական տեղեկություններ են սկսել հրապարակվել Ադրբեջանի դժգոհության առնչությամբ: Բանն այն է, որ Բաքվում դժգոհություն են արտահայտվել՝ կապված Ռուսաստանի և Ադրբեջանի միջև ռազմատեխնիկական համագործակցության հետ: Դեռ 2017 թվականի ավարտին Բաքվում կայացած ռազմատեխնիկական համագործակցության ռուս-ադրբեջանական հանձնաժողովի նիստերի ժամանակ Բաքուն հատուկ ուշադրություն է հատկացրել ռազմական տեխնիկայի մատակարարման առնչությամբ Ռուսաստանի կողմից իր պարտականությունների իրագործմանը, հայտնում է gazetavv.com-ը: Պարզվում է, ադրբեջանական կողմը գոհ չէ այն առումով, որ ըստ պայմանագրի չեն իրագործվում Տ-90Ս, ԲՄՊ-3, ԲՏՌ-82, ՍԱՈՒ «Մստա-ս», ՌՍԶՕ «Սմերչ», ԶՌԿ «Տոռ-Մ2» և այլ ռուսական սպառազինությունների մատակարարման պայմանները: Ինչպես տեղեկացրել են Ադրբեջանի իշխանությունները՝ «Սմերչ» ՌՍԶՕ-ի համար նախատեսված հրթիռները չեն պայթում կրակելու ժամանակ, ԲՏՌ-82Ա-ի գնդացիրների փամփուշտներն ընդհանրապես չեն հասնում թիրախակետերին, իսկ Մի-35 ուղղաթիռներում մշտապես նկատվում են ջերմախողովակների անսարքություններ, որոնք թույլ չեն տալիս միացնել շարժիչը: Ինչպես նաև անսարքություններ կան բեռնախցիկային սարքավորումների մեջ: Նշված խնդրում Մոսկվան խիստ կախվածության մեջ է դնում գնորդին և հնարավորություն է ստանում վերակարգման և վերանորոգման շուրջ նոր, լրացուցիչ պայմանագրերի ստորագրման: Ի դեպ, աղբյուրը հայտնում է, թե նման իրադրություն է ստեղծվել նաև Հնդկաստանի հետ ռազմատեխնիկական համագործակցության շրջանակներում: Ամերիկյան լրագրողներին հաջողվել է պարզել, որ տեխնիկական անսարքությունների պատճառով Հնդկաստանը որոշել է կրճատել Ռուսաստանից ռազմական ինքնաթիռներ գնելու քայլերը: Որոշ տվյալների համաձայն՝ Հնդկաստանի կառավարությունը նույնիսկ ցանկանում է հրաժարվել ռուսական կործանիչներից և սպառազինություն գնել ԱՄՆ-ից: Վերջին շրջանում ռուս քաղաքական գործիչները Երևանում վստահեցնում են, թե Ռուսաստանը վերանայել է Ադրբեջանի հետ զենքի վաճառքի գործարքները՝ 2016-ի ապրիլյան պատերազմից հետո: Օրերս, նույնիսկ Պետական դումայի ԱՊՀ գործերով ու եվրասիական ինտեգրման կոմիտեի նախագահի առաջին տեղակալ Կոնստանտին Զատուլինը Երևանում՝ Խորհրդարանում վստահեցրեց, թե Հայաստանի նկատմամբ ցանկացած հարձակում կամ ռազմական վտանգ Ռուսաստանը դիտարկելու է որպես սպառնալիք հենց իր նկատմամբ: Ըստ ամենայնի, ռուս-ադրբեջանական հարաբերություններում ինչ-որ բան այն չէ, «սև կատու» է անցել Պուտինի ու Ալիևի մեջ: Ու հիմա մի կողմից ռուսական կողմը հրապարակ է նետում է Ռուսաստանից Ադրբեջանի դժգոհության թեման, մյուս կողմից սիրաշահում է Հայաստանին՝ կարծես «փափուկ բարձ» դնելով մեր գլխի տակ, թե Ադրբեջանին այլևս նախկինի պես զենք չի մատակարարվելու: Համենայնդեպս, պարզ է, որ ռուս պատգամավորների հավաստիացումները, թե Մոսկվան վերանայել է զենքի վաճառքի քաղաքականությունը, դեռ ոչինչ չեն նշանակում: Ցանկացած պահի, նման գործարքներ կարող են կնքվել նոր պայմաններով: Խնդիրը մնում է հետևյալը՝ ի՞նչ է իրականում կատարվում է Մոսկվա-Բաքու հարաբերություններում... Ի՞նչ է իրականում կատարվում ռուս-ադրբեջանական հարաբերություններում իրականում, ինչ խորքային տարաձայնություններ են ի հայտ եկել՝ ցույց կտա ժամանակը: Թամար Բագրատունի