Ադրբեջանի ՊՆ-ն ռուսական զենքից դժգոհություններ չունի՞
Ադրբեջանի պաշտպանության նախարարությունը հերքել է լրատվամիջոցներում տարածված տեղեկությունը, որ խիստ դժգոհ է Ռուսաստանի մատակարարած սպառազինության որակից: Մասնավորապես, նշվել էր, որ Բաքուն թերություններ է գտել T90C տանկերում, Սմերչ զենիթահրթիռային համալիրներում և այլ զինատեսակներում: «Պաշտոնապես հայտարարում ենք, որ նման տեղեկությունները չեն համապատասխանում իրականությունն ու կրում են պրովոկացիոն բնույթ: Ադրբեջանն առանձնահատուկ ուշադրություն է դարձնում զինամթերքի ու զինտեխնիկայի ձեռբերմանը մի շարք երկրներից: Մենք առանձնահատուկ ուշադրությամբ ընտրում ենք լավագույն, ավելի որակյալ ու էֆեկտիվ զինամթերք՝ մեր ռազմական պոտենցիալի ամրապնդման համար, որը ծառայելու է օկուպացված տարածքները ազատագրելու համար: Ադրբեջանական բանակի կողմից ձեռք բերված վերջին նորագույն ռուսական զենքերը լիովին համապատասխանում են բոլոր պահանջներին, որոնք ներկայացված են ժամանակակից զինտեխնիկային»,-նշված է հաղորդագրության մեջ:
Հետևեք մեզ Viber-ում
