Դուք պատկերացնո՞ւմ եք 8 չէ 18 դիտորդ ու լրագրող հավաքվեն, ինչպե՞ս են աշխատելու

Ընտրական օրենսգրքի նախագծում առաջարկվող նոր դրույթի համաձայն ընտրական տեղամասերում միաժամանակ գտնվող տեղացի դիտորդների ու ԶԼՄ-ների ներկայացուցիչների թիվը սահմանվել է 8: Նաեւ`թե միջազգային, թե տեղական դիտորդական կազմակերպությունները կարող են մասնակցել ընտրություններին բացառապես ՀՀ նախագահի, վարչապետի, ԱԺ նախագահի կամ ԿԸՀ-ի հրավերով: Մինչդեռ, քաղաքացիական հասարակության ինստիտուտն ու լրագրողական համայնքն են վերջին շրջանում բավական ակտիվ դիտարկել հայաստանյան տարբեր ընտրությունները՝ կարողանալով հնարավորինս զսպել ընտրախախտներին: Թերեւս սպասելի էր, որ իշխանությունը փորձելու է ցանկացած մեխանիզմով սահմանափակել լրատվամիջոցների ու դիտորդների գործունեությունը։ ՀՀԿ-ական պատգամավոր Մկրտիչ Մինասյանը համաձայն չէ մեր դիտարկումներին, նա կարծում է, որ այդպիսով էլ ավելի կկանոնակարգվի ընտրությունների ընթացքը .«Իշխանությունը որեւէ մտահոգությունից ելնելով չէ այս փոփոխությունն արել, այլ խնդիրը մեկն է, որպեսզի բնականոն աշխատանքի պայման ձեւավորվի։ Դուք պատկերացնո՚ւմ եք 8 չէ 18 դիտորդ ու լրագրող հավաքվեն, ինչպե՞ս են աշխատելու»,- հարց հնչեցրեց ՀՀԿ-ական պատգամավորը։ Մեր դիտարկմանը, որ նախկինում սահմանափակում չկար, արձագանքեց. «Նախկինում երբեմն պատահում էր, որ մեկը ցանկություն ուներ շատ դիտորդներ էր բերում աղմուկ բարձրացնում»: Այնուհետև ընդգծեց, որ նոր ԸՕ-ում նշված ութը թիվը բավական է, որպեսզի նորմալ եւ թափանցիկ աշխատանքներ տարվեն. «Այդ սահմանափակումը փոքրիկ դետալ է, որպեսզի մարդիկ չչարաշահեն ու մեծ թվով չլցվեն ու չխանգարեն ընտրությունների ընթացքը։ Դուք պատկերացրեք, որ 13 հանձնաժողովականներ գումարած 8 դիտորդ, քսան հոգուց ավել միայն փոքր սենյակում»։ ՀՀԿ-ական պատգամավորն անդրադարձավ նաեւ ընդդիմադիր ուժերի դիտարկումներին ու քննադատություններին, որ նոր ԸՕ-ում չեն ընդգրկվել իրենց առաջարկները ընտրացուցակները հրապարակելու, մատերի թանաքոտման եւ այլնի հետ կապված. «Մեր հարգարժան ընդդիմախոսները սիրում են հաշվի առնել Վենետիկի հանձնաժողովի կարծիքը, ցուցակների հրապարակման վերաբերյալ հանձնաժողովը չի քննադատել եւ պայման չի դրել, ավելին, կոնկրետ այս դեպքում գաղտնիության սահմանափակում է։ Ինչ վերաբերում է մյուս դիտարկումներին, պետք է հիշեցնել, որ դեռ վերջնական նախագիծ չունենք ու որեւէ դրույթ էլ դոգմա չէ»,- ասաց ՀՀԿ-ական պատգամավորը։ Նշենք, որ նոր Սահմանադրությամբ թեեւ ամրագրվել է, որ Հայաստանն անցում է կատարում պառլամենտական համակարգին ու ամբողջովին համամասնական ընտրակարգին, սակայն նոր ԸՕ նախագծում համամասնականի ռեյտինգային տարբերակը մեծամասնականի տարրեր է հիշեցնում։ Այս առիթով ՀՀԿ-ական պատգամավորը հիշեցրեց միջազգային փորձը, ասելով նաեւ, որ ինքը դրական է համարում.«Որովհետեւ կստացվեր, որ միայն երեւանցիները պետք է պատգամավոր դառնան, իսկ այսպես մարզերում, յուրաքանչյուր ընտրատարածքում առանձին ցուցակ պետք է ներկայացվի»։ Նոր ԸՕ-ն ՀՀ խոշոր քաղաքների՝ Գյումրիի ու Վանաձորի համար սահմանել է անուղակի ընտրություն, ինչպես Երեւանում։ Սկզբում կուսակցությունների ցուցակներից ավագանիներին կընտրեն, որից հետո քաղաքապետ: «Երեւանն ապացուցե՚ց, որ աշխատող կառույց է, ուրեմն խնդիր չկա»,- այս առիթով ասաց ծնունդով գյումրեցի Մկրտիչ Մինասյանը։ Անի Սահակյան