Կեմերովոյի հրդեհի զոհերի ցուցակում 2 հայի անուն է հայտնվել. պաշտոնական զոհերի թիվը հասել է 76-ի

Քիչ առաջ  Ռուսաստանի հայերի միության Կեմերովոյի գրասենյակի ղեկավար Գեորգի Անտոնով-Միրզախանյանը հայտնեց, որ այսօր արդեն պարզվել է, որ մարտի 25-ին «Զիմնյայա վիշնյա» առևտրի կենտրոնում բռնկված մահաբեր հրդեհի զոհերի ցուցակում երկու հայ կա: Ինչպես հայտնում է Armtimes.com-ը,Միրզախանյանը հայտնեց, որ զոհերի պաշտոնական թիվն այս պահին արդեն 76 է: Ըստ Գերորգի Անտոնով-Միրզախանյանի՝ ազգությամբ հայ զոհերը հայր և որդի են, բայց ռուսական ազգանուններով՝ Գալանին Դմիտրի Սարգիսի և Գալանին Միխայիլ Դմիտրիի: Հայրը ծնվել է 1975 թվականին, որդին՝ 2008: «Փաստաթղթերում իրենք ռուսներ են համարվում, բայց Դմիտրիի հայրը Սարգիս Կարապետի Խումարյանն է՝ ծնունդով Ախալցխայից, վրացահայեր են: Բայց քանի որ Սարգիս Խումարյանը կնոջից բաժանված է եղել, տղային՝ Դմիտրիին, տվել է մոր ազգանունը՝ Գալանին, և բնականաբար տղայի տղան էլ Գալանին է: Դմիտրին Խումարյանի հարազատ տղան է: Թե՛ Դմիտրիի, թե՛ Միխայիլի մայրերը ռուսներ են: Ու քանի որ ամուսնալուծված են եղել, ծննդյան վկայականներում գրել են, որ ռուսներ են: Միայն այսօր, երբ ճշտեցին հայրանունները, պարզվեց, որ դա Սարգիսի տղան և թոռն են»,- ՀԺ-ի հետ զրույցում ասաց Գեորգի Անտոնով-Միրզախանյանը: Վերջինս հայտնեց, որ պարտրաստվում է այս տվյալները փոխանցել ՀՀ ԱԳ նախարարությանը: