Հրանուշ Հակոբյանը տվեց վարչապետի անունը
Այսօր Եռաբլուր զինվորական պանթեոնում լրագրողների հետ զրույցում Սփյուռքի նախարար Հրանուշ Հակոբյանը, անդրադառնալով վարչապետի թեկնածուի ընտրությանը, ասաց, որ ժողովուրդը նախորդ տարի տեղի ունեցած ընտրությունների ժամանակ իր ձայնը տվել է ՀՀԿ-ին, վերջինս էլ կորոշի վարչապետի իր թեկնածուին: Հակոբյանի կարծիքով՝ ՀՀԿ կողմից վարչապետի թեկնածու կառաջադրվի Սերժ Սարգսյանը և նա էլ կընտրվի: Ըստ նրա՝ նորմալ է, որ երկու տարի առաջ Սերժ Սարգսյանը հայտարարում էր՝ 3-րդ անգամ չի հավակնելու երկրի ղեկավարի պաշտոնին, նորմալ է, որ հիմա հակառակն է անում, քան ասել էր։ Հակոբյանը Սարգսյանին համեմատում է Գերմանիայի կանցլեր Անգելա Մերկելի հետ: «Կյանքը դոգմա չի, որ մի բան ասեցիր՝ անպայման դա լինի: Կյանքը զարգանում է, փոփոխվում է, դիալեկտիկայի օրենքները բոլորիս հայտնի են: Նախագահը խոստում չէր տվել, դա ընդհանրապես ասված էր տվյալ պահին: Յուրաքանչյուր պահ ունի իր տրամաբանությունը․․․Նայեք՝ Անգելա Մերկելը քանի անգամ է ընտրվում՝ 4-րդ անգամ»,- հավելել է նախարարը: Ըստ Հակոբյանի՝ այսօր և քաղաքական, և տնտեսական և աշխարհքաղաքական իրավիճակում շատ կարևոր է գործչի փորձն ու գիտելիքը, կապերն ու հարաբերությունները: Այդ բոլորը միանգամից ճիշտ չէ մի կողմ դնելը:
Հետևեք մեզ Viber-ում
