Դանակահարություն Արագածոտնում.պատճառը

ՀՀ քննչական կոմիտեի Արագածոտնի մարզային քննչական վարչությունում քննվող քրեական գործով բացահայտվել է Ոսկեվազ գյուղում տեղի ունեցած դանակահարությունը. մեղադրանք է առաջադրվել 1983թ. ծնված տղամարդուն: 2018թ. մարտի 22-ին՝ ժամը 01:05-ին, բժշկական կենտրոնից հաղորդում է ստացվել առ այն, որ որովայնի շրջանում կտրած-ծակած թափանցող վնասվածքով բուժօգնության է տեղափոխվել Արագածոտնի մարզի բնակիչը՝ ծնված 1975թ.: Դեպքի առթիվ ՀՀ ՔԿ Արագածոտնի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով եւ ձեռնարկված անհետաձգելի քննչական եւ օպերատիվ-որոնողական միջոցառումների արդյունքում պարզվել են դեպքի էական նշանակություն ունեցող մի շարք հանգամանքներ, ենթադրյալ հանցագործություն կատարած անձի ինքնությունը, ով նույն մարզի բնակիչ է՝ ծնված 1983թ., դրդապատճառը: Նախնական քննությամբ փաստական տվյալներ են ձեռք բերվել, որ տուժողը եւ ենթադրյալ հանցագործություն կատարած անձը համագյուղացիներ են, որոնց միջեւ ձեւավորվել էին անբարյացակամ, լարված հարաբերություններ՝ նախկինում համատեղ ձեռնարկատիրական գործունեությամբ զբաղվելու, ապա գործունեությունն առանձին շարունակելու հարցի հետ կապված։ Դեպքի օրը՝ մարտի 21-ին՝ ժամը 23:00-ի սահմաններում, գյուղում հանդիպելով՝ տղամարդիկ սկսել են վիճաբանել, ապա առաջացել է քաշքշոց, որի ժամանակ էլ տուժողի որովայնի հատվածում կտրող-ծակող առարկայով պատճառվել է ծանր մարմնական վնասվածք: Ձեռք բերված բավարար ապացույցների հիման վրա՝ 1983թ. ծնված տղամարդուն մեղադրանք է առաջադրվել՝ ՀՀ քրեական օրենսգրքի 112-րդ հոդվածի 1-ին մասի հատկանիշներով եւ հարցաքննվել։ Հայտնաբերվել է հանցագործության գործիք հանդիսացող դանակը: Նշանակվել են դատաբժշկական, հետքաբանական, քրեագիտական եւ դատաբժշկական համալիր փորձաքննություններ: Նախաքննությունը շարունակվում է, միջոցներ են ձեռնարկվում՝ դեպքի հանգամանքների օբյեկտիվ, լրիվ եւ բազմակողմանի քննությունն ապահովելու ուղղությամբ: