Ալիևը թերի ուսում ունի.լուրջ չվերաբերվել նրա հայտարարություններին.Զատուլին

«Անընդունելի է  ռազմական հռետորաբանության, ուժի սպառնալիքի միջոցով Լեռնային Ղարաբաղի հակամարտության խաղաղ կարգավորման գործընթացը փակուղի տանելու փորձերը: Ռուսաստանը շահագրգռված է, որպեսզի այս բարդ հակամարտության ռազմական լուծումը բացառվի»,- նման հայտարարություն արեց  Ռուսաստանի Պետական Դումայի պատգամավոր Կոնստանտին Զատուլինը  Հայաստանի խորհրդարանում լրագրողների հետ հանդիպմանը : Զատուլինը լուրջ չի վերաբերվում Ադրբեջանի նախագահ Իլհամ Ալիևի հայտարարությանը, թե «Երևանն ու Զանգեզուրն ադրբեջանական հողեր են»: «Նման հայտարարությամբ Ադրբեջանի նախագահը թուլացրեց իր դիրքերը միջազգային հարթակում:  Այդ հայտարարությունը, ամենայն հավանականությամբ, արվել է ներքին լսարանի համար՝ հաշվի առնելով այդ երկում առաջիկա ընտրությունները: Սակայն այդ հայտարարությունը քաղաքական և պատմական տեսանկյունից որևէ քննադատության չի դիմանում: Ուղղակի հասկանալի չէ, թե ինչպես որևէ մեկը կարող է լուրջ վերաբերվել այդպիսի հայտարարություններին»,- ընդգծեց Զատուլինը: Զատուլինը նաև հետաքրքիր մի դեպք հիշեց բանակցություններից, երբ դրանց ուղղակի մասնակցություն ուներ նաև Լեռնային Ղարաբաղը: «Երբ Լեռնային Ղարաբաղը մասնակցում էր բանակցային գործընթացին, բանակցություններում Լեռնային Ղարաբաղը ներկայացնում էր իմ լավ բարեկամ Արկադի Ղուկասյանը, ով այն ժամանակ արտաքին գործերի նախարարն էր: Մի օր Հռոմում բանակցային սեղանի շուրջ սուր քննարկումներից հետո ադրբեջանցի պատվիրակը փորձեց ինչ-որ ձևով թուլացնել լարվածությունը, մոտեցավ Արկադի Ղուկասյանին, ով մտահոգ տեսք էր ընդունել և հարցրեց, թե ինչո՞ւմն է խնդիրը: Արկադի Ղուկասյանը պատասխանեց, որ Կոլիզեյի ճանապարհին տեսել է Հռոմեական Կայսրության քարտեզը, որտեղ նկատել է, որ այն տարածքների վրա, որ միշտ իրենցն են համարել, գրված է «Մեծ Ադրբեջան»: Դա երեկոյան էր, իսկ հաջորդ օրն առավոտյան ադրբեջանական պատվիրակության բոլոր անդամները բանակցությունների էին եկել բարկացած, քանի որ գնացել էին տեսնելու, որ Հռոմեական Կայսրության քարտեզի վրա ամենուր գրված է Մեծ Ադրբեջան, սակայն տեսել էին, որ բոլոր տեղերում գրված է եղել Մեծ Հայք: Այնպես որ, ես Ադրբեջանի նախագահի նման հայտարարությունը չեմ կարող այլ բանի հետ կապել, քան պատմության թերի ուսման»,- ընդգծեց ՌԴ Պետդումայի պատգամավորը: