Կայացրած որոշումներով հաղթողներ և պարտվողներ չպետք է լինեն.ՍԴ-ի առանձնահատկությունն է. Հրայր Թովմասյան
Սոցիալական, ֆունկցիոնալ և ինստիտուցիոնալ անկախության կարգավորման պարագայում մենք կարող ենք անկախ լինել, «Արմենիա» հեռուստաընկերության «Ռ-էվոլյուցիա» հաղորդման եթերում այս մասին ասաց Սահմանադրական դատարանի նորընտիր նախագահ Հրայր Թովմասյանը: «Սահմանադրական դատարանը կամ սահմանադրական արդարադատությունն ունի առանձնահատկություն, որ կայացրած որոշումներով հաղթողներ և պարտվողներ չպետք է լինեն, որովհետև գերագույն խնդիրը Սահմանադրության գերակայության ապահովումն է, որ պիտի անի Սահմանադրական դատարանը: Դիմողի օգտին է կայացվել որոշումը, պատասխանողի օգտին է կայացվել, սահմանադրական է ճանաչվել, հակասահմանադրական է ճանաչվել, սա կոչված է երկրում ապահովելու Սահմանադրության գերակայությունը»,-հավելեց ՍԴ նորընտիր նախագահը:
«Երբեմն քննադատվում է, որ Սահմանադրական դատարանի որոշումները բավականին բարդ են, ինքն իր գործընկերների հետ քննարկել է և եկել է այն եզրահանգման, որ իրոք կան որոշումներ, որ իրենց էությամբ չեն էլ կարող պարզ լինել: Բայց պետք է գտնել ձև, որ շատ հակիրճ, սեղմ կերպով այդ որոշումը կարողանան արտացոլել, որ մատչելի լինի նաև սովորական քաղաքացիների համար, իրենք չեն նստելու 40 էջ կարդան»,ասաց Թովմասյանը:
Հրայր Թովմասյանի գնահատմամբ՝ Սահմանադրական դատարանի որոշումները մատչելի դարձնելու առումով իրոք խնդիր կա: Հանրային ընկալմամբ՝ Սահմանադրական դատարանն ինչ-որ մեծ աշխատանք չի կատարում: Սահմանադրական դատարանի մասին հանրությունը, քաղաքական շրջանակները սկսում են հիշել հատկապես ընտրությունների ժամանակ: «Ընտրության արդյունքների հետ կապված վեճերը քննելը Սահմանադրական դատարանի հիմնական գործառույթը չէ, և ընտրական պրոցեսների վերաբերյալ հանրային բացասական տրամադրությունները մարդիկ կենտրոնացնում են Սահմանադրական դատարանի վրա: Այս առումով պատկերն այնպիսին է, որ կան անվստահության ինչ-որ էլեմենտներ: Սա պիտի փոխվի»:
Հետևեք մեզ Viber-ում
