Իշխանափոխության համար ընդդիմությունը պետք է սպասի 2022-ին

«Հանրապետականը շուտով կհրապարակի իր վարչապետի թեկնածուի անունը :Մենք դեռ որոշում չենք կայացրել, դուք հնչեցնում եք անուններ։ Եթե այս քաղաքական զարգացումների փուլում նպատակահարմար գտնենք, որ լինի ձեր նշած թեկնածուն, կտանք դրա հիմնավորումները»,-ԱԺ ճեպազրույցների ժամին լրագրողների դիտարմանը,թե բոլորի համար ակնհայտ է, որ վարչապետի թեկնածուն Սերժ Սարգսյանն է լինելու պատասխանեց ՀՀԿ խմբակցության ղեկավար Վահրամ Բաղդասարյանը։ Փողոցային պայքարի հնարավորությունների մասին խոսելիս  Բաղդասարյանն ընդգծեց, որ դրա անհրաժեշտությունը չի տեսնում.« Խորհրդարանն է այսուհետ լինելու այն մարմինը, որտեղ ընդդիմությունը կարող է իր թեկնածուն առաջադրել և նոր Սահմանադրությամբ խորհրդարանն է այն ամբիոնը, որտեղ յուրաքանչյուր քաղաքական ուժ ճիշտ քաղաքական քարտեզ մշակելու դեպքում կհասնի հաջողության։Ինձ համար հասկանալի չեն խորհրդարանական ուժերը, որոնք կարող են թողնել խորհրդարանը և գնալ փողոցային պայքարի ճանապարհով։ Ժամանակը ցույց կտա։ Ինձ թվում է, որ դրա հիմքերը չկան, յուրաքանչյուր քաղաքական ուժ ինքն է որոշում՝ ինչ պայքար է ընտրում»: Նրա խոսքով՝ իշխանափոխության կարելի է հասնել միայն սահմանադրության շրջանակներում։ «Ընդդիմությունը հանգիստ պիտի սպասի մինչև 2022 թվականը և խորհրդարանի ձևավորման ժամանակ պետք է համապատասխան ձայները վաստակի, որպեսզի սահմանադրական ճանապարհով հասնի իր նպատակին», - ընդգծեց Բաղդասարյանը։