ՀՀԿ-ն ընդդեմ Վիգեն Սարգսյանի

ՀՀ Զինված ուժերի շտաբի պետի նախկին տեղակալ Հայկազ Բաղմանյանը նշանակվել է Հավաքական անվտանգության պայմանագրի կազմակերպության (ՀԱՊԿ) միացյալ շտաբի պետ:Բաղմանյանը պաշտոնից ազատվել էր 2017 թվականի դեկտեմբերին Սերժ Սարգսյանի հրամանագրով: ՀՀ պաշտպանության նախարար Վիգեն Սարգսյանը լրագրողների հետ զրույցում հայտարարել էր, թե ԳՇ պետի տեղակալն աշխատանքից ազատվելու դիմում է գրել իր հորդորով: Հարցին, թե որն է եղել հորդորի պատճառը, Վիգեն Սարգսյանը պատասխանել էր. «Աշխատանքային մի շարք պարտականությունների չկատարումը»: Հիշեցնենք, որ ՀԱՊԿ գլխավոր քարտուղարի պաշտոնը 2017 թվականի մայիսի 2-ից զբաղեցնում է ՀՀ ԶՈՒ ԳՇ նախկին պետ Յուրի Խաչատուրովը: ՀԱՊԿ շտաբի պետի պաշտոնը 2015 թվականից զբաղեցնում է գեներալ-գնդապետ Անատոլի Սիդորովը: Շտաբի պետի պաշտոնը ռոտացիոն է:  ՀԱՊԿ միավորված շտաբի պետի պաշտոնում թեկնածուին առաջարկում է անդամ պետություններից մեկի ղեկավարը: Թեկնածուին այդ պաշտոնում նշանակում է անդամ պետությունների ղեկավարներից բաղկացած կազմակերպության հավաքական անվտանգության խորհրդը: Այսինքն ՀԱՊԿ-ն դառնում է Հայաստանում վարկաբեկված զինվորական կադրերի հավաքատեղի:ԱԺ նախկին խոսնակ, ՀՀԿ-ական պատգամավոր Գալուստ Սահակյանը կարծում է, որ անուրանալի ու անգնահատելի է Հայկազ Բաղմանյանի դերը մեր բանակի կյանքում.<<Բաղմանյան Հայկազը լուրջ ծառայություններ ունի մեր պետության համար, ինքն առաջին սպաներից մեկն է եղել>> ,-մեզ հետ զրույցում ասաց Գալուստ Սահակյանը: Նա չի կարծում, թե Բաղմանյանին ամիսներ առաջ պաշտոնից հեռացրել են աշխատանքում ունեցած թերացման համար, ինքն անձամբ չի լսել նախարար Վիգեն Սարգսյանի մեկնաբանությունը սակայն վստահ է՝ Բաղմանյանը լուրջ զինվորական է, իսկ թերություններ ունենք բոլորս, թերություն չունեցողները Գգալուստ Սահակյանի խոսքով՝ հրեշտակներն են.<<Կառուցվածքային փոփոխություններ էին, ինչի պատճառով էլ Բաղմանյանը իր դիմումի հիման վրա ազատվեց: Բաղմանյանն այն մարդը չէ, որ կարող է մեծ վնաս հասցնել բանակին, քանի որ երբ մեզնից յուրաքանչյուր չգիտեինք ինչ է լինելու պետության հետ, Բաղմանյանը զենքը ձեռքին պատերազմի դաշտում էր>>: ԱԺ գեներալ պատգամավոր Սեյրան Սարոյանը խորհրդարանում լրագրողների հետ զրույցում նույնպես անդրադարձավ գեներալ-լեյտենանտ Հայկազ Բաղմանյանին նոր պաշտոնի նշանակելուն: Սարոյանն էլ է կարծում,  որ անթերի մարդ չկա այս աշխարհում, աշխատող մարդը միշտ էլ թերություններ է ունենում: Նա կասկած չուներ, որ Բաղմանյանին պետք է նորից պաշտոն տային.«Տաշած քարը գետնին չի մնում», ասաց Սեյրան Սարոյանը: Հարցին, թե այսինքն՝ ներե՞լ են նրան, Սարոյանը պատասխանեց. «Ի՞նչ ա էրե Հայկազը, որ ներել են: Հայկազի անցած ուղին գիտե՞ս»: Նշենք, որ  Բաղմանյանի անունը կապվում է կոռուպցիոն գործընթացների հետ. «Հայկազի ձեռն ի՞նչ կա, որ կոռուպցիա: Զինվորի մարտական պատրաստվածության մեջ կոռուպցիան որտեղից: Ձեր տնից գողցե՞ էդ մարդը, ինչ պաշտոն ուներ, որ գողնար, էդ մարդը մարտական պատրաստվածության պետն էր, ի՞նչ պտի գողնար, զինվոր պտի գողնա՞ր: Ի՞նչ գողնար էդ խեղճ տղեն»: Սարոյանը համաձայն չէ այն պնդումների հետ, որ Հայկազ Բաղմանյանն ազատվել էր նախկին պաշտոնից, որովհետև չարաշահումներ էր կատարել.«Էդ մեղադրողը ղալաթ ա անում, գլուխն էլ պատին ա տալիս։ Թող գնան, իրա դեմ ասեն։ Բոլորդ էլ շատ լավ հասկանում եք՝ ինչի մասին ա խոսքը, ուղղակի սթից խոսում եք, գողացավ, չէ մի` բռնեց սպանեց, վամպիր ա»: Ստացվում է, որ ՀՀԿ-ականները համաձայն չեն Վիգեն Սարգսյանի հետ, ով ամիսներ առաջ Բաղմանյանին ազատեց պաշտոնից եւ անուղղակի մեղադրում են նրան Բաղմանյանի պես կադր կորցնելու համար: Անի Սահակյան