ՀՅԴ-ն կդառնա՞ ընդդիմություն

Տնտեսական մրցակցության պաշտպանության հանձնաժողովի նախագահ Արտակ Շաբոյանն այսօր ԱԺ արտահերթ նիստում ներկայացրեց, թե առաջինից երկրորդ ընթերցման ժամանակ «Տնտեսական մրցակցության պաշտպանության մասին» օրենքի նախագծում ինչ փոփոխությունների առաջարկներ են եղել: ՀՅԴ-ն առաջարկել էր, որ հանձնաժողովի անդամներից մեկի թեկնածությունը ներկայացվի ընդդիմադիր պատգամավորների կողմից: Առաջարկը մերժվել է։ Շաբոյանի բացատրությամբ մարմինը վարչական է, հանձնաժողովը պետք է լինի ապաքաղաքական,ուստի առաջարկում են պահպանել կառավարության կողմից ներկայացված տարբերակը, ըստ որի, հանձնաժողովի բոլոր անդամների թեկնածությունները պետք է ներկայացվեն վարչապետի կողմից ԱԺ-ին: ՀՅԴ խմբակցության քարտուղար Աղվան Վարդանյանը հակադարձեց՝ իրենց առաջարկը չի հակասում Շաբոյանի ասածին, իրենք էլ գիտեն, որ պետք է մասնագետ լինել՝ հանձնաժողովում աշխատելու համար եւ իրենց թեկնածուն էլ կարող է բավարարել բոլոր այդ չափանիշներին: Եթե ընտրվեց հանձնաժողովի անդամ, նա քաղաքական որեւէ կախվածություն չպետք է ունենա: Շաբոյանը անդրդվելի մնաց։ «Ելքի» պատգամավոր Էդմոն Մարուքյանը եւս զարմացավ Շաբոյանի պատասխանից։ Նա հիշեցրեց, որ ԱԺ խմբակցություններն իրավունք ունեն Բարձրագույն դատական խորհրդի անդամի թեկնածու առաջարկել, նախօրեին ԱԺ-ն ՍԴ նախագահ է նշանակել, որին առաջարկել էր ԱԺ նախագահը. «Ուզում եք ասել, որ այդ բոլոր նշանակումները եղել են քաղաքականապես կաշկանդվա՞ծ, եւ այդ մարդիկ քաղաքական ուժի պատվերնե՞րն են կատարելու: Դա աշխարհով մեկ հայտնի սկզբունքն է: Այդ մարդն ընտրվելու դեպքում դառնում է անաչառ: Նաեւ ապրիլի 9-ից հետո ԱԺ-ում վճռաբեկ դատարանների դատավորներ ենք նշանակելու, հիմա ուզում եք ասել, որ նրանք ԱԺ պատվերն են կատարելո՞ւ»,-հարց ուղղեց Մարուքյանը: Արտակ Շաբոյանը պատասխանեց, որ սովորաբար մրցակցության պաշտպանության մարմինները անկախ են եւ անկախ են նաեւ կառավարությունից: Եթե որեւէ կուսակցություն առաջադրի, այդ կուսակցությունից կախվածության մեջ կգտնվի: «Լուսավոր Հայաստան» կուսակցությունը երկու ամիս առաջ հակակոռուպցիոն փաթեթ դրեց շրջանառության մեջ, որը մերժվեց։ Մարուքյանն ասաց, որ իրենք առաջարկում էինք ապակուսակցականացնել հանձնաժողովը և պնդում, որ քանի որ «Արտակ Շաբոյանը Հանրապետական կուսակցության խորհրդի անդամ է, նա չի կարող հետապնդել այդ կուսակցության անդամներին տնտեսական մրցակցության լույսի ներքո և մրցակցությունը պաշտպանել: Հիմա Արտակ Շաբոյանը այստեղ հայտարարում է, որ անընդունելի է, որ ընդդիմությունը հանձնաժողովի անդամի պաշտոնում թեկնածություն առաջադրելու իրավունք ունենա: Մեր խմբակցության պատգամավոր պարոն Արամ Սարգսյանն առաջարկում է կողմ քվեարկել այս նախածգին, և մենք կարող ենք կողմ քվեարկել, սակայն նոր հանձնաժողովում, պարոն Շաբոյան, Դուք չպետք է լինեք՝ այս ամբիոնից ձեր իրականացրած պնդումների հիման վրա՝ չնայած, որ այդ պնդումներն այնքան էլ իրատեսական չեն»։ Օրենքն ընդունվեց 84 կողմ ձայներով եւ 6 ձեռնպահով։ Կողմ էին բոլոր խմբակցությունները ձեռնպահ ՀՅԴ-ականները։ Կարելի է եզրակացնել, որ առաջիկայում ՀՅԴ-ն ընդդիմություն է դառնալու։ Անի Սահակյան