Փաշինյանը կքանդի ՀՀԿ խմբակցությունը

Այս գումարման Ազգային ժողովում իմ թիրախը ՀՀԿ խմբակցությունն է, և ես կաշխատեմ այդ ուղղությամբ, լրագրողների հետ զրույցում ասաց «Ելք» խմբակցության ղեկավար Նիկոլ Փաշինյանը:

Ինչ վերաբերում է դաշինքի մյուս երկու կուսակցություններին և այն լուրերին, որ շատ հարցերի շուրջ «Ելք»-ում կոնսեսուս չկա, ապա Փաշինյանն ասաց. «Դուք բոլորդ էլ տեսնում եք, որ ԵԼՔ-ում աշխատանքային նորմալ մթնոլորտ է, բոլորս միասնաբար քվեարկում ենք բոլոր հարցերի վերաբերյալ, եւ ես հույս ունեմ, որ կգանք ընդհանուր հայտարարի: Չեմ կարծում, թե անհաղթահարելի ճեղքեր ենք առաջացրել մեր մեջ, որը կարող է հանգեցնել կատաստրոֆիկ հետեւանքների: Ես հարգանքով եմ վերաբերում մեր գործընկեր կուսակցությունների դիրքորոշումներին եւ շնորհակալ եմ, որ նրանք էլ հարգանքով են վերաբերում մեր դիրքորոշումներին: Մենք ունենք կոնսենսուս այն մասին, որ չունենք կոնսենսուս, ինչը չի նշանակում, որ այդ թեմայով խոսակցությունը փակված է: Մյուս շաբաթ մեր գործընկերներին կներկայացնեմ ճանապարհային քարտեզի վերջնական տարբերակը, որ նրանք նախապես տեղեկացված լինեն: Չեմ կասկածում, որ երբ պահը գա, մեր գործընկերները կանեն իրենցից կախված առավելագույնը՝ պրոցեսները ժողովրդավարության օրինականության եւ զարգացման հուն տեղափոխելու համար: Անկախ հետագա իրադարձություններից՝ մենք աշխատանքային մթնոլորտը պահելու ենք»,- ասաց նա։

Փաշինյանն ընդգծեց, որ երբ գա համապատասխան պահը, ապա բոլոր կուսակցությունները պետք է վճռեն, թե որ կողմում են ուզում լինել: