15 հազար դրամով 2 ամիս աշխատելն առնվազն ծիծաղելի է. Կարինե Խոդիկյանը նոր հարթակ է ստեղծել. ՀԺ

Այսօր տեղի ունեցավ հայ արձակագիր, դրամատուրգ Կարինե Խոդիկյանի tatron-drama.am կայքի շնորհանդեսը: Կայքի նպատակն է մեկ ընդհանուր հարթակ բերել դասական ու արդի դրամատուրիգիան եւ Հայաստանում գործող թատրոնները, ստեղծել բարենպաստ պայմաններ՝ ազգային թատրոնի եւ ազգային դրամատուրգիայի փոխհամագործակցության համար: Կարինե Խոդիկյանը նշեց, որ ստեղծվող շտեմարանի հիմքը 2000 թվականից պարբերաբար տպագրվող «Դրամատուրգիա» հանդեսն է. «Մտածեցինք, որ ժամանակն է ընդլայնել նրա ճանաչման սահմանը, պահանջը վաղուց կար»: Կարիենե Խոդիկյանն իր նորաբաց կայքի շնորհանդեսին հաշված մարդկանց էր հրավիրել՝ դրամատուրգիայի զարգացման հետ անմիջական կապ ունեցողներին: Պատվավաոր հյուրերի շարքում էին Հակոբ Պարոնյանի անվան երաժշտական կոմեդիայի թատրոնի գեղարվեստական ղեկավար Երվանդ Ղազանչյանը, դրամատուրգ Նորայր Ադալյանը, դրամատուրգ Սամվել Կոսյանը եւ երիտասարդ թատերագետ Տիգրան Մարտիրոսյանը, որի հոդվածը պատվիրվել է նորաստեղծ կայքի առաջին տեսական հատվածի համար: Կարինե Խոդիկյանն ասաց, որ երիտասարդ դրամատուրգներին եւ թատերագետներին բազմիցս առաջարկել է նմանատիպ հարթակ ստեղծել, սակայն ասել են, որ իմաստ, չունի քանի որ դրամատուրգներից շատերն իրար հետ այնքան լավ հարաբերությունների մեջ չեն եւ քննարկումների նոր հարթակ ստեղծելը ավելորդ կոնֆլիկտի առիթ է հանդիսանալու: «Ինձ հետաքրքիր չէ, թե իտալացի կամ անգլիացի մեկի գործը ինչպես է բեմադրում հայ բեմադրիչը, ուստի, այս կայքի նպատակն է, որ ցանկացած հայ դրամատուրգի գործերի մասին՝ լինեն դասական, թե՝ ժամանակակից, հրապարակվելուց հետո առնվազն երեքից չորս թատերագետների կողմից կայքի պատվերով գրվեն հոդվածներ: Հոդվածագիրներից ամեն մեկն իր դիտարկումներով հանդես կգա, ապա կլինի կլոր սեղան եւ կարծիքների փոխանակում, գուցե եւ մտքերի բախում»,- ահա այսպես է Խոդիկյանը պատկերացնում կայքի հետ կապված հետագա ծրագրերը:   Մանրամասները՝ armtimes.com