Մի շաբաթվա ընթացքում իշխանափոխությունը հրապարակում «քցած է լինելու». Փաշինյան
Մեզ համար սկզբունքային է քաղաքական պայքարի խաղաղ անցկացումը, լրագրողների հետ զրույցում ասաց «Ելք» խմբակցության ղեկավար Նիկոլ Փաշինյանը՝ ողջունելով Վալոդյա Ավետիսյանի քայլը, ով հացադուլ է անում և նստացույց անողներին, ովքեր դեմ են Սերժ Սարգսյանի՝ վարչապետ դառնալուն:
«Դա մենք համարում ենք բաց ձեռքերի քաղաքականություն, որը ենթադրում է շատ կոնկրետ գործողություններ, բայց որը բացառում է բռնությունը: Այսինքն՝ նույնիսկ հակաբռնությունը մեզ համար անընդունելի է»,- ասաց Փաշինյանը:
Հարցին՝ հասարակությունը ոտքի կկանգնի՞, նշեց, որ դա մի հարց է, որի պատասխանն իրենք կփորձեն գտնել գործողության մեջ. «Մենք կարող ենք ասել, որ մեր շրջանում էներգետիկա զգում ենք։ Սկզբի համար դա, կարծում եմ, բավարար է ու մենք հույս ունենք, որ մեր գործողություններով այդ էներգետիկան կհաղորդենք հանրությանը»։
Փաշինյան նշեց, որ նոր Սահմանադրությունը չի խոչընդոտում պայքարել Սերժ Սարգսյանի իշխանավարման երկարացման դեմ՝ պնդելով, որ ապրիլի 9-17-ը երբ դեռևս Հայաստանը վարչապետ չի ունենա, հետևաբար Սերժ Սարգսյանը ֆորմալ առումով ազդեցություն չի ունենալու ոչ ԱԱԾ-ի, ոչ էլ ոստիկանության վրա, իսկ նոր կառավարությունն էլ դեռ ձևավորված չի լինելու, ապա հնարավոր կլինի իշխանափոխություն իրականացնել. «Կոպիտ ասած, եթե քաղաքական ժարգոնով արտահայտվելու լինենք՝ էդ մի շաբաթվա ընթացքում իշխանափոխությունը հրապարակում «քցած է լինելու», և եթե պարզվի, որ կա ժողովուրդ, ով պատրաստ է այն գնալ վերցնել այդ իշխանությունը, կգնա և կվերցնի»։
Հետևեք մեզ Viber-ում
