Հնարավոր է՝ փորձում են ինձ ներքաշել և դարձնել այդ կոնֆլիկտի կողմ. Լևոն Մկրտչյան
ԿԳ նախարար Լևոն Մկրտչյանն այսօր խորհրդարանում լրագրողների հետ զրույցում անդրադարձավ Շիրակի պետական համալսարանում տեղի ունեցած միջադեպին և մեղադրանքներին, որ ինքը սատարում է համալսարանի ռեկտորին: «Մենք այնտեղ ուսումնասիրություն ենք իրականացրել, այնուհետև կատարվել է աուդիտ: Աշխատանքների կազմակերպման բոլոր խնդիրներն այդ նիստի ընթացքում կքննարկվեն: Աշխատանքից ազատելու հարցերը կարգավորվում են աշխատանքային օրենսգրքով: Եթե եղել են խախտումներ, խորհուրդը կարող է վարչական խորհրդատվության դիմել կամ աշխատանքից ազատված դասախոսները կարող են դիմել դատարան: Հնարավոր է՝ փորձում են ինձ ներքաշել և դարձնել այդ կոնֆլիկտի կողմ, ինչը չի լինի: Ես իսկապես աշխատանքային հնարավորություններ եմ ստեղծում, որևէ այլ հարաբերություն չունեմ»,- ասաց նախարարը: Հարցին՝ քանի որ ինքը հայտարարել է, որ սատարում է Շիրակի համալսարանի ռեկտորին, հնարավո՞ր է, որ միակողմանի վերաբերմունք է ցուցաբերել, պատասխանեց. «Ոչ, հնարավոր չէ»: Նա ասաց, որ շաբաթ օրը համալսարանի գիտխորհրդի նիստ է լինելու, որին մասնակցելու է նաև ինքը:
Հետևեք մեզ Viber-ում
