Ինչո՞ւ է գազը Հայաստան հասնում 150 դոլարով, իսկ բնակչին վաճառվում 290 դոլարով

Հայաստանն Իրանից կարող է ունենալ ավելի էժան գազ, ուղղակի չկա դրա համար քաղաքական կամք, բանակցողներ, իշխանություն: Այս մասին, այսօր՝ մարտի 21-ին, ԱԺ-ում էներգետիկ համակարգի վերաբերյալ «Ելք» խմբակցության հարցապնդման քննարկման ժամանակ նշել է նույն խմբակցության պատգամավոր Էդմոն Մարուքյանը: «Հիմա գազը Հայաստան հասնում է 1000 խմ-ի դիմաց 150 դոլարով, սակայն բնակիչներին է հասնում մոտ 290 դոլարով (139 000 դրամ): Այս տարբերությունը որտեղի՞ց է, ես այս հարցին չեմ լսել հոդաբաշխ պատասխան, թե ինչու է բնակիչն այդքան թանկ ստանում գազը: Երբ ասում եք, որ Հայաստանը գազն էժան է ստանում, դուք սահմանի գինն եք ասում, չեն ասում տանը վառվող գազի գինը, որը շատ ավելի թանկ է շատ այլ երկրների գներից, որոնք եւս Ռուսաստանից են գազ ստանում»,- հարցրեց Մարուքյանը Էներգետիկ ենթակառուցվածքների եւ բնական պաշարների նախարար Աշոտ Մանուկյանին: «Տարբերության մեջ մտնում են  ծախսերը եւ 7,25 տոկոս կորուստները: Մեր բոլոր սակագները սահմանվում են հանձնաժողովի կողմից, բաց, թափանցիկ գորչծիքակազմի եւ նաեւ տրվում է ժամանակ այդ սակագները հանրության հետ քննարկելու համար: Յուրաքանչյուր սակագնի բաղկացուցիչ մասը դրա ծախսային հոդվածներն են: Որ ծախսային մասն եք համարում ուռճացված, ասեք, ես պատրաստ եմ լրջորեն քննարկել եւ ներկայացնել տեղեկատվություն»,- ասաց Աշոտ Մանուկյանը: Նա հայտարարեց, որ Թուրքմենստան-Իրան-Վրաստան գազի տարանցման համար Հայաստանը պատրաստ է լինել չափազանց առաձգական. «Թուրքմենստանից Հայաստան գազի մատակարարումների շուրջ քննակումները մշտապես գնացել են և գնալու են, սակայն որևէ տեղաշարժ չկա, որովհետև առաջարկվող գները մրցունակ չեն»: