Դրանք չեն համապատասխանում իրականությանը. Արծրուն Հովհաննիսյանը Խրամչիխինի հոդվածի մասին
Ռուսաստանցի ռազմական փորձագետ, Քաղաքական և ռազմական վերլուծության ինստիտուտի փոխտնօրեն Ալեքսանդր Խրամչիխինին վերլուծական հոդված է հրապարակել Հայաստանի Հանրապետության, Լեռնային Ղարաբաղի Հանրապետության զինված ուժերի ենթակայության տակ գտնվող ստորաբաժանումների վերաբերյալ, նշելով՝ որ իր տվյալներով՝ որտե՞ղ են տեղակայված զինվորական զորամասերը, ի՞նչ սպառազինություն ունեն, ի՞նչ քանակի ռազմական տեխնիկա և այլն: Այս հարցի շուրջ ՀՀ ՊՆ մամուլի քարտուղար Արծրուն Հովհաննիսյանը կարծիք հայտնեց, թե «Ռազմարդյունաբերական սուրհանդակ» (ВПК) ռազմական մասնագիտացված շաբաթաթերթի այսօրվա համարում տպագրված՝ «Ֆորպոստ մի շարք հարցերով…» վերնագրված հոդվածում շատ անճշտություններ կան՝ ինչպես լինում է նմանատիպ ցանկացած վերլուծության դեպքում: «Ես ծանոթացա այդ վերլուծությանը: Դա փորձագետի անձնական տեսակետն է, որոնք լիովին չեն համապատասխանում իրականությանը: Նման վերլուծություններում «կարմիր թելով» անցնում է այն միտքը, որ հայկական զինուժը բարձր մարտունակություն ունի, որ հայկական բանակն ամենամարտունակն է տարածաշրջանում և այլն: Եվ թերևս այս առումով կարելի է համաձայնել ռուս փորձագետի հետ, բայց մանրամասները՝ կապված բանակի սպառազինության և այլ հարցերի հետ, բնականաբար, չեն կարող անկախ փորձագետների մոտ լիովին ճշմարիտ լինել»,- շեշտեց նա:
Հետևեք մեզ Viber-ում
